കൊച്ചിയിൽ ബാറിൽ വെടിവെപ്പ്; രണ്ട് ജീവനക്കാർക്ക് പരിക്ക്, പ്രതികൾക്കായി തിരച്ചിൽ

കൊച്ചി: കൊച്ചി കതൃക്കടവ് ഇടശ്ശേരി ബാറിന് മുന്നിൽ വെടിവെപ്പ്. രണ്ടു ബാർ ജീവനക്കാർക്ക് പരിക്കേറ്റു. ബാർ ജീവനക്കാരായ സിജിൻ, അഖിൽ എന്നിവർക്കാണ് പരുക്കേറ്റത്. സിജിന്റെ വയറിലും അഖിലിന്റെ കാലിലുമാണ് പരുക്കുള്ളത്. രണ്ടുപേരെയും ആശുപത്രിയിലേക്ക് മാറ്റി.

ഞായറാഴ്ച രാത്രി 11.30ഓടെ ബാർ ജീവനക്കാരും പുറത്തുനിന്ന് എത്തിയവരും തമ്മിലുണ്ടായ സംഘർഷത്തിന് പിന്നാലെയാണ് വെടിവെപ്പുണ്ടായത്. മദ്യം നൽകുന്നതുമായി ബന്ധപ്പെ‌ട്ട് ഉയർന്ന തർക്കമാണ് സംഘർഷത്തിൽ കലാശിച്ചതെന്നാണ് വിവരം. ബാറിലേക്ക് കയറുന്ന ഗേറ്റിന് മുന്നിൽവെച്ച് നാലു യുവാക്കൾ തർക്കമുണ്ടാക്കുകയായിരുന്നു. ബാങ്ക് മാനേജർക്ക് യുവാക്കളിൽനിന്ന് മർദനമേറ്റു. ഇതുകണ്ട് രണ്ടു ബാർ ജീവനക്കാരെത്തി സംഘർഷത്തിൽ ഇടപെട്ടു. ഈ സമയത്താണ് അക്രമി സംഘത്തിലെ യുവാക്കളിൽ ഒരാൾ എയർ പിസ്റ്റൾ ഉപയോഗിച്ച് വെടിയുതിർത്തത്. തുടർന്ന് യുവാക്കൾ കാറിൽ ഇവിടുന്ന് പോകുകയും ചെയ്തു.

സംഭവത്തിൽ എറണാകുളം നോർത്ത് പൊലിസ് അന്വേഷണമാരംഭിച്ചു. സിസിടിവി ദൃശ്യങ്ങൾ ശേഖരിച്ച പൊലിസ് അന്വേഷണം തുടരുകയാണ്. യുവാക്കൾ സഞ്ചരിച്ച കാർ തൊടുപുഴ സ്വദേശിയുടെ പേരിലാണ് രജിസ്റ്റർ ചെയ്തിരിക്കുന്നത്.