പേരാമ്പ്ര: സ്വാതന്ത്ര്യദിനത്തിന്റെ 'സ്വാതന്ത്ര്യ'ത്തില്‍ ബൈക്കില്‍ ഹെല്‍മെറ്റ് ധരിക്കാതെ ചുറ്റിക്കറങ്ങിയ പൊലിസിന്റെ മുന്നില്‍പെട്ട വില്ലന്മാര്‍ക്കു കഴിഞ്ഞ ദിവസം ശരിക്കും വയറുനിറഞ്ഞു ! ഫൈനോ മടുപ്പിക്കുന്ന ബോധവല്‍ക്കരണമോ ഒന്നുമായിരുന്നില്ല വയറുനിറച്ചത്. ശരിക്കും ഉഗ്രന്‍ പായസം തന്നെ!
പെരുവണ്ണാമൂഴി പൊലിസാണു സ്വാതന്ത്ര്യദിനത്തില്‍ സ്റ്റേഷനു മുന്നിലെ റോഡിലൂടെ ഹെല്‍മെറ്റ് ധരിക്കാതെ വന്ന ഇരുചക്ര വാഹനക്കാരെയെല്ലാം പിടിച്ചു വയറുനിറയെ പായസം കുടിപ്പിച്ചത്. കൂടെ ചെറിയ ഉപദേശം കൂടി നല്‍കിയാണ് പൊലിസ് യാത്രക്കാരെ വെറുതെവിട്ടത്. ആഘോഷത്തിന്റെ ഭാഗമായി സബ് ഇന്‍സ്‌പെക്ടര്‍ കെ.കെ രാജന്‍ സ്റ്റേഷനു മുന്നില്‍ പതാക ഉയര്‍ത്തിയ ശേഷമാണ് പൊലിസുകാര്‍ റോഡിലേക്കിറങ്ങി പായസവും ഉപദേശവും നല്‍കിത്തുടങ്ങിയത്.
എ.എസ്.ഐമാരായ കെ.എം കുമാരന്‍, ബാബു പുതുശ്ശേരി, റൈറ്റര്‍ പ്രകാശന്‍, സി.പി.ഒമാരായ സുരേഷ് വേളം, പ്രകാശ് ചാക്കോ, കെ.കെ ബിജു, കെ.കെ രാജേഷ് കുമാര്‍ നേതൃത്വം നല്‍കി.