കൊച്ചി: സില്‍വര്‍ ലൈന്‍ പദ്ധതിയുമായി ബന്ധപ്പെട്ട് ഏതാനും ചിലരുടെ എതിര്‍പ്പിന് സര്‍ക്കാര്‍ വഴങ്ങില്ലെന്ന് മുഖ്യമന്ത്രി പിണറായി വിജയന്‍. നാടിനെ പുരോഗതിയിലേക്ക് നയിക്കുകയാണ് ലക്ഷ്യം.

പദ്ധതിയുമായി ബന്ധപ്പെട്ട് ഒന്നും മറച്ചുവെച്ചിട്ടില്ലെന്നും മുഖ്യമന്ത്രി പറഞ്ഞു. സില്‍വര്‍ ലൈന്‍ പദ്ധതി വിശദീകരണത്തിനായി എറണാകുളത്ത് സംഘടിപ്പിച്ച 'ജനസമക്ഷം സില്‍വര്‍ലൈന്‍' പരിപാടിയില്‍ സംസാരിക്കുകയായിരുന്നു മുഖ്യമന്ത്രി.

നാടിന്റെ ഭാവിക്കു വേണ്ട കാര്യം, ചില ആളുകള്‍ എതിര്‍ത്തു എന്നതുകൊണ്ടു മാത്രം സര്‍ക്കാര്‍ ഉപേക്ഷിച്ചു പോകുന്നതു ശരിയല്ല. ജന ജീവിതം മെച്ചപ്പെടണം. ജീവിതം നവീകരിക്കപ്പെടണം. അതാവണം ഏതൊരു സര്‍ക്കാരും ചെയ്യേണ്ടത്.

ഏതാനും ചിലരുടെ എതിര്‍പ്പിനു മുന്നില്‍ വഴങ്ങിക്കൊടുക്കലല്ല സര്‍ക്കാരിന്റെ ധര്‍മം. നാടിന്റെ ഭാവിക്കു വേണ്ടത് നടപ്പാക്കുകയാണ് സര്‍ക്കാര്‍ ഉത്തരവാദിത്വമെന്നും മുഖ്യമന്ത്രി പറഞ്ഞു.