കോഴിക്കോട്
കെ.പി.സി.സി പ്രസിഡന്റ് കെ. സുധാകരനെതിരേ പ്രകോപനപരമായ പ്രസ്താവനയുമായി ഒഡേപെക് ചെയർമാൻ കെ.പി അനിൽകുമാർ. പേപ്പട്ടിയെപ്പോലെ ആളുകളെ ഉപദ്രവിച്ചു നടക്കുകയാണെങ്കിൽ പേപ്പട്ടിയെ തല്ലിക്കൊല്ലുന്നതുപോലെ സുധാകരനെ തെരുവിൽ കൈകാര്യം ചെയ്യാൻ കേരളത്തിൽ ആണുങ്ങളുണ്ടെന്നായിരുന്നു അനിൽകുമാറിന്റെ പരാമർശം.

ഇടുക്കിയിലെ എഞ്ചിനീയറിങ് വിദ്യാർഥി ധീരജ് കൊലചെയ്യപ്പെട്ടതിൽ പ്രതിഷേധിച്ച് ഡി.വൈ.എഫ്.ഐ ജില്ലാ കമ്മിറ്റി നടത്തിയ ജനകീയ കൂട്ടായ്മയിൽ സംസാരിക്കുകയായിരുന്നു അദ്ദേഹം. കെ.പി.സി.സി മുൻ ജനറൽ സെക്രട്ടറിയായ അനിൽകുമാർ കഴിഞ്ഞ സെപ്റ്റംബറിലാണ് സി.പി.എമ്മിൽ ചേർന്നത്.

സുധാകരന് കോൺഗ്രസുകാരനായി മാത്രം പ്രവർത്തിക്കാമെങ്കിൽ ഇവിടെ രാഷ്ട്രീയ പ്രവർത്തനം നടത്താമെന്ന് അനിൽകുമാർ പറഞ്ഞു. അരുംകൊലയ്ക്ക് നേതൃത്വം നൽകുന്ന സുധാകരൻ നാടിനും കോൺഗ്രസിനും ആപത്താണ്. ഇടുക്കിയിൽ യൂത്ത് കോൺഗ്രസ് നേതാവ് നിഖിൽ പൈലിയുടെ കൈയിൽ കൊടുത്ത കത്തി സുധാകരൻ നാളെ ഉമ്മൻ ചാണ്ടിയുടെയും ചെന്നിത്തലയുടെയും നെഞ്ചിൽ കയറ്റില്ലെന്ന് ഉറപ്പുപറയാൻ പറ്റുമോ? സ്വർണം കായ്ക്കുന്ന മരമാണെങ്കിലും പുരയിലേക്ക് ചാഞ്ഞാൽ വെട്ടിക്കളയണം. മറ്റുള്ളവരെ ഭീഷണിപ്പെടുത്തിയാണ് സുധാകരൻ സ്ഥാനമാനങ്ങൾ സ്വന്തമാക്കിയത്. ബ്ലേഡ്, മണൽ മാഫിയകളുമായി മാത്രം കൂട്ടുകെട്ടുള്ളയാളാണ് സുധാകരനെന്നും അനിൽകുമാർ പറഞ്ഞു.