മലപ്പുറം: കോണ്‍ഗ്രസ് നേതാക്കള്‍ പാണക്കാട് സന്ദര്‍ശനം നടത്തിയതിനെതിരെ വര്‍ഗീയ പരാമര്‍ശം നടത്തിയ സി.പി.എം സംസ്ഥാന സെക്രട്ടറിയുടെ ചുമതലയുള്ള എ. വിജയരാഘവനെതിരെ ഉമ്മന്‍ചാണ്ടി. സങ്കുചിത രാഷ്ട്രീയ താല്‍പര്യത്തോടെയാണ് വിജയരാഘവന്റെ പ്രസ്താവനയെന്ന് ഉമ്മന്‍ചാണ്ടി പറഞ്ഞു.

യു.ഡി.എഫ് നേതാക്കളുടെ പാണക്കാട് സന്ദര്‍ശനത്തെ പോലും വര്‍ഗീയമായാണ് എ. വിജയരാഘവന്‍ കാണുന്നത്. പാണക്കാട് പോകാന്‍ കഴിയാത്തതിന്റെ പരിഭവമാണ് വിജയരാഘവന്‍ പറഞ്ഞ് തീര്‍ക്കുന്നത്. കിട്ടാത്ത മുന്തിരി പുളിക്കുമെന്നും ഉമ്മന്‍ചാണ്ടി മലപ്പുറത്ത് പരിഹസിച്ചു.

ഐക്യജനാധിപത്യ മുന്നണി ഒറ്റക്കെട്ടായി തന്നെ നിയമസഭാ തെരഞ്ഞെടുപ്പിനെ നേരിടും. അവസരത്തിനൊത്ത് രാഷ്ട്രീയ നിലപാട് മാറ്റുന്ന പാര്‍ട്ടിയാണ് സി.പി.എം. കെ.എം മാണിയുടെ പാര്‍ട്ടിയുമായി വരെ കൂട്ടുകൂടാന്‍ സി.പി.എമ്മിന് മടിയുണ്ടായിട്ടില്ല. കെ.എം മാണി അഴിമതിക്കാരനല്ലെന്ന നിലപാടില്‍ അന്നും ഇന്നും കോണ്‍ഗ്രസ് ഉറച്ച് നില്‍ക്കുകയാണെന്നും ഉമ്മന്‍ചാണ്ടി പറഞ്ഞു.