കോഴിക്കോട്: എന്‍.സി.പി ഇടതുമുന്നണി വിടുമെന്ന വാര്‍ത്തകള്‍ തള്ളി മന്ത്രി എ.കെ ശശീന്ദ്രന്‍ വീണ്ടും. എന്‍.പി.പിയുടെ മുന്നണി മാറ്റത്തെ കുറിച്ച് ചര്‍ച്ച നടന്നിട്ടില്ലെന്ന് അദ്ദേഹം വ്യക്തമാക്കി. കേന്ദ്ര നേതൃത്വത്തെ പരാതി അറിയിച്ചിട്ടില്ലെന്നും അദ്ദേഹ കൂട്ടിച്ചേര്‍ത്തു. മാണി സി കാപ്പന്റെത് വ്യക്തപരമായ അഭിപ്രായം. പുതിയ പാര്‍ട്ടികള്‍ വരുമ്പോള്‍ വിട്ടുവീഴ്ച ചെയ്യേണ്ടി വരുമെന്നും അദ്ദേഹം പറഞ്ഞു.

ഞാനും കൂടി പങ്കെടുക്കുന്ന യോഗത്തിലാണ് അത്തരം തീരുമാനങ്ങള്‍ നടക്കുക. താനില്ലാതെ അത്തരത്തിലൊരു തീരുമാനമെടുക്കുമെന്ന ആശങ്കയില്ല. സംസ്ഥാന പ്രസിഡന്റ് ദേശീയ പ്രസിഡന്റിനെ കാണുന്നത് സ്വാഭാവികമാണ്- ശശീന്ദ്രന്‍ പറഞ്ഞു.

എല്ലാ കാലത്തും സീറ്റ് ചര്‍ച്ച നടക്കാറുണ്ട്. അതിന് ശേഷമേ തീരുമാനം പറയൂ. ഇടത് ജനാധിപത്യ മുന്നണിയുമായി ബന്ധം വിച്ഛേദിക്കേണ്ട സാഹചര്യം ഇപ്പോഴുണ്ടായിട്ടില്ല. മാണി സി. കാപ്പന്‍ പാര്‍ട്ടിയുടെ നല്ല പ്രവര്‍ത്തകനാണ്. എന്‍.സി.പിയെ തള്ളിപ്പറഞ്ഞ് അദ്ദേഹം പാര്‍ട്ടി വിട്ടു പോകുമെന്ന് കരുതില്ലെന്നും മന്ത്രി കൂട്ടിച്ചേര്‍ത്തു.