ഡല്‍ഹി : ഇന്ത്യന്‍ വിദ്യാര്‍ഥികള്‍ രക്ഷാമാര്‍ഗം തേടി അലയുന്നതിനിടെ മെഡിസിന്‍ പഠനം ഇന്ത്യയിലാക്കണമെന്ന ഉപദേശവുമായി പ്രധാനമന്ത്രി നരേന്ദ്ര മോദി . പുറംനാടുകളിലെ വ്യത്യസ്ത സാഹചര്യങ്ങളില്‍ ഇന്ത്യന്‍ മെഡിക്കല്‍ വിദ്യാര്‍ഥികള്‍ പഠിക്കുന്നുണ്ട്. ഇത്തരം വിദ്യാര്‍ഥികള്‍ക്ക് ഇന്ത്യയില്‍ തന്നെ പഠിക്കാന്‍ സൗകര്യം ഒരുക്കാന്‍ സ്വകാര്യ മേഖലയോട് അദ്ദേഹം പറഞ്ഞുവെന്ന് ഡെക്കാന്‍ ഹെറാള്‍ഡ് റിപ്പോര്‍ട്ട് ചെയ്യുന്നു.
കേന്ദ്ര ബജറ്റിലെ ആരോഗ്യമേഖലയുമായി ബന്ധപ്പെട്ട പ്രഖ്യാപനങ്ങളെക്കുറിച്ച് സംഘടിപ്പിച്ച വെബിനാറില്‍ സംസാരിക്കുകയായിരുന്നു പ്രധാനമന്ത്രി. മെഡിക്കല്‍ വിദ്യാഭ്യാസത്തിനുള്ള ഭൂമി അനുവദിക്കുന്നതിനായി എല്ലാ സര്‍ക്കാരുകളും നയങ്ങള്‍ രൂപീകരിക്കണമെന്നും അങ്ങനെയെങ്കില്‍ ഇന്ത്യയ്ക്ക് ഒരുപാട് മികച്ച ഡോക്ടര്‍മാരെയും പാരാമെഡിക്കല്‍ വിദഗ്ധരെയും ലഭിക്കുമെന്നും അദ്ദേഹം പറഞ്ഞു.
റഷ്യന്‍ അധിനിവേശം ശക്തമായതോടെ യുക്രെയ്‌നില്‍ നിരവധി ഇന്ത്യന്‍ വിദ്യാര്‍ഥികള്‍ കുടുങ്ങി കിടക്കുന്ന പശ്ചാത്തലത്തില്‍ പ്രധാനമന്ത്രിയുടെ പ്രസ്താവന ശ്രദ്ധേയമാകുകയാണ്. എന്നാല്‍ ഇതേക്കുറിച്ച് പ്രത്യക്ഷമായി മോദി പരാമര്‍ശിച്ചില്ല.