വി.കെ പ്രദീപ്
കണ്ണൂർ
വീട്ടിലിരുന്ന് ജോലിചെയ്യാം എന്ന പേരിൽ ബാങ്ക് അക്കൗണ്ടിൽനിന്ന് പണം തട്ടി പുതിയ സൈബർ തട്ടിപ്പ്.
എസ്.എം.എസായും വാട്‌സ് ആപ്പിലുമെത്തുന്ന ഇത്തരം സന്ദേശങ്ങളെ പൂർണമായും അവഗണിക്കണമെന്ന് പൊലിസ് മുന്നറിയിപ്പ് നൽകി. ഓൺലൈൻ പഠനത്തിനായി മൊബൈൽ ഫോൺ ഉപയോഗം വർധിച്ച കാലത്ത് വിദ്യാർഥികളുടെ രക്ഷിതാക്കളുടെ മൊബൈൽ ഫോണിലേക്കാണ് കൂടുതലായി ഇത്തരം സന്ദേശങ്ങളെത്തിയിട്ടുള്ളതെന്ന് സൈബർ പൊലിസിന്റെ നിരീക്ഷണത്തിൽ കണ്ടെത്തി.
ജോലിക്ക് നിങ്ങളെ തെരഞ്ഞെടുത്തിരിക്കുന്നുവെന്ന് കാണിച്ച് ദിനംപ്രതി വലിയ തുക വാഗ്ദാനം ചെയ്താണ് വ്യാജസന്ദേശങ്ങൾ എത്തുന്നത്. ഒരു ദിവസം 9000രൂപ വരെ വാഗ്ദാനം ചെയ്താണ് സന്ദേശമെത്തുക. സന്ദേശം ലഭിച്ചു കഴിഞ്ഞാൽ ബാങ്ക് അക്കൗണ്ട് വിവരങ്ങൾ അടക്കം സന്ദേശം വന്ന നമ്പറുകളിലേക്ക് അയച്ചു കൊടുക്കാൻ പറയും. ഇത്തരത്തിൽ വിവരങ്ങൾ കൈമാറിയാൽ അതു തട്ടിപ്പിന് കളമൊരുക്കലാണെന്ന് പൊലിസ് പറയുന്നു.