ന്യൂഡല്‍ഹി: സര്‍വകലാശാല വൈസ് ചാന്‍സലര്‍ നിയമനങ്ങളില്‍ ചാന്‍സലര്‍ക്ക്  അധികാരം കൂടുതല്‍ നല്‍കുന്ന നിയമ പരിഷ്‌കാരത്തിന്റെ കരട് യുജിസി വിജ്ഞാപനം ചെയ്തു. വൈസ് ചാന്‍സലര്‍മാരുടേയും അധ്യാപകരുടേയും അക്കാദമിക് സ്റ്റാഫുകളുടേയും നിയമനത്തിനും സ്ഥാനക്കയറ്റത്തിനുമായുള്ള പരിഷ്‌കരിച്ച കരട് ചട്ടങ്ങളാണ് യുജിസി പുറത്തിറക്കിയിരിക്കുന്നത്.

കരടില്‍ പറയുന്നത് വിസി നിയമനത്തിനുള്ള സെര്‍ച്ച് കമ്മിറ്റിയെ നിശ്ചിയിക്കുക ചാന്‍സലര്‍ ആയിരിക്കുമെന്നാണ്. കേരളത്തിലെ പ്രധാന സര്‍വകലാശാലകളിലെല്ലാം ചാന്‍സലര്‍ ഗവര്‍ണറായതിനാല്‍ ഫലത്തില്‍ വിസി നിയമനങ്ങളില്‍ ഗവര്‍ണര്‍ക്ക് കൂടുതല്‍ അധികാരങ്ങള്‍ ലഭിക്കുകയും ചെയ്യും. 2018ലെ യുജിസി വിജ്ഞാപനത്തില്‍ വിസി നിയമനാധികാരം ആര്‍ക്കാണെന്നു കൃത്യമായി രേഖപ്പെടുത്തിയിരുന്നില്ല. ഇത് തര്‍ക്കത്തിനും കേസുകള്‍ക്കും കാരണമായിരിക്കുമ്പോഴാണ് യുജിസിയുടെ പരിഷ്‌കാരങ്ങള്‍.

കരടിലെ വ്യവസ്ഥയനുസരിച്ച് ചാന്‍സലര്‍ നിര്‍ദേശിക്കുന്ന ആളാകും സെര്‍ച്ച് കമ്മിറ്റി ചെയര്‍പേഴ്‌സന്‍ ആവുക. രണ്ടാമത്തെ അംഗത്തെ യുജിസി ചെയര്‍മാനും നാമനിര്‍ദേശം ചെയ്യും. സിന്‍ഡിക്കേറ്റ്, സെനറ്റ്, എക്‌സിക്യൂട്ടീവ് കൗണ്‍സില്‍, ബോര്‍ഡ് ഓഫ് മാനേജ്‌മെന്റ് എന്നിങ്ങനെയുള്ള സമിതികള്‍ക്ക് മൂന്നാമത്തെ അംഗത്തെ നിര്‍ദേശിക്കാവുന്നതാണ്. അപേക്ഷകരില്‍ നിന്നു കമ്മിറ്റി നിര്‍ദേശിക്കുന്ന 3, 5 പേരില്‍ നിന്നു ഒരാളെ ചാന്‍സലര്‍ക്കു വിസിയായി നിയമിക്കാം. പുനര്‍ നിയമനത്തിനും അനുമതിയുണ്ട്.

സര്‍വകലാശാല വിസി നിയമനങ്ങളെ ചൊല്ലിയുള്ള ഗവര്‍ണര്‍- സര്‍ക്കാര്‍ പോരുകള്‍ രൂക്ഷമായ സാഹചര്യത്തിലാണ് പുതിയ കരട് ചട്ടം യുജിസി ഇറക്കിയിരിക്കുന്നത്. കേന്ദ്ര, സംസ്ഥാന സര്‍വകലാശാലകള്‍ക്ക് പുതിയ ചട്ടം ബാധകമാണ്. ഇതിനു വിരുദ്ധമായി നടത്തുന്ന വിസി നിയമനം അസാധുവാകുന്നതുമാണ്.

The University Grants Commission (UGC) has issued a draft notification introducing a reform that grants the Chancellor greater authority in the appointment of university Vice-Chancellors.