ഗുവഹാത്തി: അസമിലെ കല്‍ക്കരി ഖനിയില്‍ നിരവധി തൊഴിലാളികള്‍ കുടുങ്ങിക്കിടക്കുന്നതായി റിപ്പോര്‍ട്ട്. ദിമ ഹസാവോ ജില്ലയില്‍ സ്ഥിതി ചെയ്യുന്ന കല്‍ക്കരി ഖനിയിലാണ് തൊഴിലാളികള്‍ കുടുങ്ങി കിടക്കുന്നത്. മേഖലയില്‍ അപ്രതീക്ഷിതമായി വെള്ളം കയറിയതാണ് തൊഴിലാളികള്‍ ഖനിയിൽ കുടുങ്ങാൻ കാരണമായത്. ഏകദേശം 18 തൊഴിലാളികള്‍ കുടുങ്ങിക്കിടക്കുന്നതായാണ് പുറത്തു വരുന്ന റിപ്പോര്‍ട്ട്.

കുടുങ്ങിയ ആളുകളുടെ എണ്ണം ഔദ്യോഗികമായി സ്ഥിരീകരിച്ചിട്ടില്ല. കൃത്യമായ കണക്ക് ഇപ്പോള്‍ പറയാനാകില്ലയെന്ന് ദിമ ഹസാവോ പൊലീസ് സൂപ്രണ്ട് മായങ്ക് കുമാര്‍ ഝാ അറിയിച്ചു. സംസ്ഥാന ദുരന്ത നിവാരണ സേനയും ( എസ്ഡിആര്‍എഫ് ) ദേശീയ ദുരന്ത നിവാരണ സേനയും ( എന്‍ഡിആര്‍എഫ് ) സ്ഥലത്തെത്തിയിട്ടുണ്ട് രക്ഷാപ്രവര്‍ത്തനത്തിന് സൈന്യത്തിന്റെ സഹായം തേടിയതായും മുഖ്യമന്ത്രി അറിയിച്ചു.