കുവൈത്ത് സിറ്റി: പ്രവാസികള്‍ക്കായുള്ള ബയോമെട്രിക് നടപടികളുടെ സമയപരിധി അവസാനിച്ചപ്പോള്‍ 224,000 പേര്‍ ഇനിയും ബാക്കിയുള്ളതായി റിപ്പോര്‍ട്ട്. ബയോമെട്രിക് നടപടികള്‍ പൂര്‍ത്തിയാക്കാത്ത പ്രവാസികളുടെ ബാങ്ക് അക്കൗണ്ടുകള്‍ ഉള്‍പ്പെടെയുള്ള ഇടപാടുകളില്‍ നിയന്ത്രണം തുടങ്ങിയിട്ടുണ്ട്.

ബയോമെട്രിക് പൂര്‍ത്തിയാക്കാനുള്ള വ്യക്തികളില്‍ 76 ശതമാനം പേരും സമയപരിധിക്കുള്ളില്‍ ബയോമെട്രിക് പൂര്‍ത്തിയാക്കിയിട്ടുണ്ട്. ഏകദേശം 224,000 താമസക്കാര്‍, 88,600 ബിദുനികള്‍, 16,000 പൗരന്മാര്‍ എന്നിവരാണ് നടപടികള്‍ പൂര്‍ത്തിയാക്കാന്‍ ബാക്കിയുള്ളത്. ജനുവരി ഒന്നു മുതല്‍ ഇവരുടെ ഔദ്യോഗിക, ധനകാര്യ സ്ഥാപനങ്ങളിലുടനീളമുള്ള ഇടപാടുകള്‍ക്ക് നിയന്ത്രണം ആരംഭിച്ചിട്ടുണ്ട്. പ്രവാസികളുടെ ബയോമെട്രിക് നടപടികള്‍ പൂര്‍ത്തിയാക്കാനുള്ള സമയപരിധി ഡിസംബര്‍ 31ന് കഴിഞ്ഞിരുന്നു. സ്വദേശികളുടെ നടപടികളുടെ കാലാവധി സെപ്റ്റംബറിലാണ് അവസാനിച്ചത്. ബയോമെട്രിക് നടപടികള്‍ പൂര്‍ത്തിയാക്കാത്തവര്‍ക്കായുള്ള പ്രത്യേക കേന്ദ്രങ്ങള്‍ തുടര്‍ന്നും പ്രവര്‍ത്തിക്കും.