മലപ്പുറം: യു.ഡി.എഫ് പ്രവേശന ചര്‍ച്ചകള്‍ക്കിടെ പി.വി അന്‍വര്‍ എം.എല്‍.എ പാണക്കാട് എത്തി സാദിഖലി ശിഹാബ് തങ്ങളുമായി കൂടിക്കാഴ്ച്ച നടത്തി. കൂടിക്കാഴ്ച്ചയില്‍ രാഷ്ട്രീയ ചര്‍ച്ചകള്‍ നടന്നിട്ടില്ലെന്ന് ഇരുവരും മാധ്യമങ്ങളോട് വ്യക്തമാക്കി. 

ചൊവ്വാഴ്ച്ച സാധാരണഗതിയില്‍ പാണക്കാട് സന്ദര്‍ശകര്‍ എത്തുന്ന ദിവസമാണ്. പിവി അന്‍വറും തന്നെ കാണാന്‍ പാണക്കാട് എത്തിയതാണ്. ചായ കുടിച്ച് അന്‍വര്‍ മടങ്ങുമെന്നും സാദിഖലി ശിഹാബ് തങ്ങള്‍ പ്രതികരിച്ചു. യുഡിഎഫിലേക്കെന്ന വാദത്തില്‍ മുന്നണി വിശദമായ ചര്‍ച്ചയ്ക്ക് ശേഷം തീരുമാനിക്കും. വന നിയമത്തിന്റെ ബുദ്ധിമുട്ട് നിരവധി ഇടങ്ങളില്‍ ഉണ്ട്. പുതിയ വന നിയമഭേദഗതി സര്‍ക്കാര്‍ പുനഃപരിശോധിക്കേണ്ടതുണ്ട്. അക്കാര്യത്തില്‍ മനുഷ്യത്വപരമായ സമീപനമാണ് ഉണ്ടാകേണ്ടത്. അതിലെ സങ്കീര്‍ണതകള്‍ പരിഹരിക്കേണ്ടതുണ്ട്. വനമേഖലയിലെ ജനങ്ങള്‍ അനുഭവിക്കുന്ന ബുദ്ധിമുട്ടുകള്‍ കണ്ടില്ലെന്ന് നടിക്കാനാവില്ല. യുഡിഎഫ് അധികാരത്തില്‍ വരണമെന്ന് കേരളത്തിലെ ജനങ്ങള്‍ ആഗ്രഹിക്കുന്നുണ്ടെന്നും അദ്ദേഹം പ്രതികരിച്ചു.

അതേസമയം, യു.ഡി.എഫുമായി ബന്ധപ്പെട്ട ഒരു കാര്യങ്ങളും കൂടിക്കാഴ്ചയില്‍ ചര്‍ച്ചയായില്ലെന്ന് പി വി അന്‍വര്‍ പറഞ്ഞു. മുന്നോട്ടുള്ള പോരാട്ടങ്ങള്‍ക്ക് പിന്തുണ തേടിയാണ് എത്തിയത്. യു.ഡി.എഫുമായി സഹകരിക്കാന്‍ താല്‍പ്പര്യമുണ്ടെന്നും അദ്ദേഹം ആവര്‍ത്തിച്ചു. പിണറായി സര്‍ക്കാരിനെ താഴെയിറക്കുക എന്നതാണ് ലക്ഷ്യം. അതിനെക്കുറിച്ചാണ് തങ്ങളുമായി ചര്‍ച്ച നടത്തിയത്. അടുത്തതായി പ്രതിപക്ഷ നേതാവിനേയും യു.ഡി.എഫിലെ മറ്റ് നേതാക്കളെയും ഘടകകക്ഷികളേയും കാണും. ഇതേ കാര്യങ്ങളില്‍ ചര്‍ച്ച നടത്തുമെന്നും അന്‍വര്‍ പറഞ്ഞു.