ഹരിപ്പാട്: വീട്ടുകാര്‍ പള്ളിയില്‍ പോയ സമയത്ത് ആറര പവനും, 1,20,000 രൂപയും മോഷണം പോയ സംഭവത്തില്‍ കുട്ടി മോഷ്ടാക്കള്‍ പിടിയില്‍. ഹരിപ്പാട് പൊലിസാണ് കുട്ടിമോഷ്ടാക്കളെ അറസ്റ്റ് ചെയ്തത്.
കാര്‍ത്തികപ്പള്ളി വെട്ടുവേനി ചെങ്കിളി കിഴക്കതില്‍ രാജു വര്‍ഗ്ഗീസിന്റെ വീട്ടിലാണ് 15 ന് രാത്രിയില്‍ മോഷണം നടന്നത്. രാജു വര്‍ഗീസും ഭാര്യ ശാന്തമ്മയും മാത്രമായിരുന്നു വീട്ടില്‍ താമസം.
ഇവര്‍ പള്ളിയില്‍ റാസ കാണാന്‍ പോയ സമയത്താണ് മോഷണം നടന്നത്. സംഭവം നടന്ന ദിവസം മോഷണം നടന്ന വീടിന് സമീപത്ത് ഇരുവരെയും കണ്ടിരുന്നു എന്ന രഹസ്യ വിവരത്തിന്റെ അടിസ്ഥാനത്തിലാണ് കസ്റ്റഡിയില്‍ എടുത്തത്.  
തുടര്‍ന്ന് ചോദ്യം ചെയ്യലില്‍ ഇരുവരും കുറ്റം സമ്മതിച്ചു. പിടിയിലായ ഒരാളുകെ പക്കല്‍ നിന്നും മോഷണ മുതലായ 17,500 രൂപയും വീടിനു പുറകില്‍ ഒളിപ്പിച്ചിരുന്ന സ്വര്‍ണ്ണാഭരണങ്ങളും പൊലിസ് കണ്ടെടുത്തു. മറ്രൊരു പ്രതിയുടെ പക്കല്‍ നിന്നും 5000 രൂപയും മോഷ്ടിച്ച പണം കൊടുത്ത് വാങ്ങിയ മോട്ടോര്‍ സൈക്കിള്‍, മൊബൈല്‍ ഫോണ്‍ എന്നിവയും കണ്ടെടുത്തു. കഴിഞ്ഞ 12 ന് രാത്രിയില്‍ ഡാണാപ്പടി പാലത്തിന് സമീപം മോട്ടോര്‍ സൈക്കിളിലെത്തി കാറുകള്‍ക്കും ലോറികള്‍ക്കും നേരെ കല്ലുകള്‍ വലിച്ചെറിയുകയും ഡ്രൈവര്‍ക്ക് പരുക്കേല്‍ക്കുകയും ചെയ്ത കേസും ഇവര്‍ ചെയ്തതാണെന്ന് ചേദ്യം ചെയ്യലില്‍ തെളിഞ്ഞതായി പൊലിസ് അറിയിച്ചു.
കായംകുളം ഡിവൈ.എസ്.പി എന്‍ രാജേഷിന്റെ നിര്‍ദ്ദേശ പ്രകാരം കായംകുളം പൊലിസ് ഇന്‍സ്‌പെക്ടര്‍ സദന്റെ മേല്‍നോട്ടത്തില്‍ ഹരിപ്പാട് എസ്.ഐ എസ്.എസ് ബൈജു, സി.പി.ഒമാരായ സന്തോഷ്, ഇല്ല്യാസ്, അഞ്ജു, അനീഷ്, സുകു, നിസാറുദ്ദീന്‍ എന്നിവരാണ് പ്രതികളെ പിടികൂടിയത്.