ന്യൂഡൽഹി
ഉക്രൈനിൽ കുടുങ്ങിയ വിദ്യാർഥികളടക്കമുള്ള ഇന്ത്യക്കാരെ തിരികെ നാട്ടിലെത്തിക്കാൻ കേന്ദ്രം സത്വര നടപടികൾ സ്വീകരിക്കുന്നതിനിടെ, വിവാദ പ്രസ്താവനയുമായി കേന്ദ്രമന്ത്രി പ്രഹ്ലാദ് ജോഷി.
വിദേശത്ത് മെഡിസിൻ പഠിക്കുന്ന 90 ശതമാനം പേരും ഇന്ത്യയിൽ യോ​ഗ്യതാ പരീക്ഷകളിൽ പരാജയപ്പെടുന്നുവെന്നാണ് മന്ത്രിയുടെ വിവാദ പരാമർശം. മെഡിസിൻ പഠിക്കാൻ വിദ്യാർഥികൾ എന്തുകൊണ്ട് വിദേശത്ത് പോകുന്നുവെന്നത് ചർച്ച ചെയ്യാൻ പറ്റിയ സമയമല്ലിതെന്നും അദ്ദേഹം പറഞ്ഞു. വിദേശത്തുനിന്ന് മെഡിക്കൽ ഡി​ഗ്രി പാസാകുന്നവ‍ർക്ക് ഇന്ത്യയിൽ പ്രാക്ടീസ് നടത്തണമെങ്കിൽ ഫോറിൻ മെഡിക്കൽ ​ഗ്രാജ്വേറ്റ്സ് പരീക്ഷ പാസാവണമെന്നാണ് ചട്ടം. ഉക്രൈനിൽ റഷ്യ നടത്തിയ ഷെല്ലാക്രമണത്തിൽ കഴിഞ്ഞ ദിവസം കർണാടക സ്വദേശിയായ മെഡിക്കൽ വിദ്യാർഥി നവീൻ ശേഖരപ്പ കൊല്ലപ്പെട്ടതിനു പിന്നാലെയാണ് മന്ത്രിയുടെ പ്രസ്താവനയെന്നതും ശ്രദ്ധേയമാണ്. മെഡിസിൻ പഠനത്തിനായി വിദേശരാജ്യങ്ങളിൽ പോകേണ്ടതില്ലെന്നും ഇന്ത്യയിൽ തന്നെ പഠിക്കണമെന്നും പ്രധാനമന്ത്രി മോദിയും നേരത്തെ വ്യക്തമാക്കിയിരുന്നു. ഉക്രൈനിൽ റഷ്യൻ അധിനിവേശം തുടങ്ങിയതിന്റെ രണ്ടാം ദിവസമാണ് മോദി ഇത്തരത്തിൽ പ്രസ്താവന നടത്തിയത്.