റിയാദ്: റെക്കോഡ് തുകയ്ക്ക് സഊദി അറേബ്യയിലെ അന്നസര്‍ ക്ലബ്ബില്‍ കളിക്കാന്‍ രണ്ടു വര്‍ഷത്തെ കരാറൊപ്പിട്ട പോര്‍ച്ചുഗല്‍ സൂപ്പര്‍ താരം ക്രിസ്റ്റ്യാനോ റൊണാള്‍ഡോ റിയാദിലെത്തി. അഞ്ച് തവണ ബാലണ്‍ ഡി ഓര്‍ ജേതാവായ 37 കാരന്‍ ഇന്നലെ രാത്രി വൈകിയാണ് തലസ്ഥാനത്തെത്തിയത്.

താരത്തെ ക്ലബ്ബിന്റെ ആയിരക്കണക്കിന് ആരാധകര്‍ക്ക് മുന്നില്‍ അവതരിപ്പിക്കുന്നത് ഉള്‍പ്പെടെ വിവിധ പരിപാടികള്‍ അന്നസര്‍ ആസൂത്രണം ചെയ്യുന്നുണ്ട്. റിയാദിലെ അന്നസറിന്റെ 25,000 ശേഷിയുള്ള മിര്‍സൂല്‍ പാര്‍ക്ക് (കിങ് സഊദ് സര്‍വകലാശാല സ്റ്റേഡിയം) സ്റ്റേഡിയത്തിലായിരിക്കും ചടങ്ങുകള്‍. സൗദി ലീഗില്‍ മത്സരിക്കുന്നതിനു മുമ്പായി ക്രിസ്റ്റ്യാനോയുടെ ഫിറ്റ്‌നസും ആരോഗ്യവും ഉറപ്പാക്കാന്‍ ക്ലബ്ബില്‍ മെഡിക്കല്‍ പരിശോധന നടത്തും.

റൊണാള്‍ഡോയെ അന്നസര്‍ ആരാധകര്‍ക്കും ലോകത്തിനും മുന്നില്‍ ക്ലബ്ബ് പ്രസിഡന്റ് മുസല്ലി അല്‍മുഅമ്മര്‍ അവതരിപ്പിക്കുമെന്ന് പ്രതീക്ഷിക്കുന്നു. മുഴുവന്‍ ക്ലബ്ബ് പ്രതിനിധികളും പങ്കെടുക്കും. ഒമ്പത് തവണ സൗദി ലീഗ് ചാമ്പ്യന്‍മാരാണ് അന്നസര്‍.

അതിനിടെ, കൂടുതല്‍ മിന്നും താരങ്ങളെ രാജ്യത്തെത്തിക്കുമെന്ന് സൗദി കായിക മന്ത്രി അബ്ദുല്‍ അസീസ് ബിന്‍ തുര്‍ക്കി അല്‍ഫൈസല്‍ രാജകുമാരന്‍ പ്രഖ്യാപിച്ചു. രാജ്യത്തെ മറ്റ് ക്ലബ്ബുകളില്‍ മികച്ച അന്താരാഷ്ട്ര താരങ്ങളെ എത്തിക്കുന്നതിന് എല്ലാ വിധ പിന്തുണയും സഹായവും നല്‍കാന്‍ പ്രതിജ്ഞാബദ്ധമാണെന്ന് മന്ത്രി ട്വീറ്റ് ചെയ്തു.