തിരുവനന്തപുരം: കാലിക്കറ്റ് സര്‍വകലാശാലക്കു കീഴില്‍ പ്രവര്‍ത്തിക്കുന്ന അറബിക് കോളജുകള്‍ നിര്‍ത്തലാക്കുന്ന നടപടിയില്‍നിന്നു പിന്‍മാറുമെന്ന് അറിയിച്ച് സര്‍വകലാശാലാ അധികൃതര്‍. 

സുപ്രഭാതം വാര്‍ത്തയെ തുടര്‍ന്ന് വിവിധ സംഘടനകളുടെ നേതൃത്വത്തില്‍ നടത്തിയ ശക്തമായ പ്രതിഷേധത്തെ തുടര്‍ന്നാണ് സര്‍വകലാശാല സിന്‍ഡിക്കേറ്റ് നടപടികളില്‍നിന്നു പിന്‍മാറുമെന്ന് അറിയിച്ചത്. സംഭവം വിവാദമായതോടെ സി.പി.എം സംസ്ഥാന കമ്മിറ്റി ഇടപെട്ടാണ് നടപടി നിര്‍ത്തലാക്കണമെന്ന് സിന്‍ഡിക്കേറ്റിനോടാവശ്യപ്പെട്ടത്. 

 

വിഷയത്തില്‍ ദ്രുതഗതിയില്‍ പരിഹാരം കാണണമെന്നാണ് പാര്‍ട്ടി തലത്തില്‍നിന്നു സിന്‍ഡിക്കേറ്റിന് ലഭിച്ച നിര്‍ദേശം. കൂടാതെ മലബാര്‍ മേഖലയില്‍ വിഷയം രാഷ്ട്രീയ തലത്തിലേക്ക് കൂടി വഴി മാറിപോകാന്‍ സാധ്യതയുള്ളതിനാലാണ് പാര്‍ട്ടി സംസ്ഥാന കമ്മിറ്റി നേരിട്ടിടപെട്ട് പിന്‍മാറണമെന്നാവശ്യപ്പെട്ടത്. ഇതിന്റെ അടിസ്ഥാനത്തില്‍ ഇന്നുനടക്കുന്ന സിന്‍ഡിക്കേറ്റ് യോഗത്തില്‍ വിഷയം പരിഗണിക്കേണ്ടെന്നാണ് സര്‍വകലാശാല അധികൃതരുടെ തീരുമാനം. സര്‍വകലാശാലയും സര്‍ക്കാരും അറബിക് കോളജുകള്‍ക്കെതിരല്ലെന്നും നടപടിയില്‍നിന്നു പിന്‍മാറുകയാണെന്നും കാണിച്ച് ഇന്നലെ സിന്‍ഡിക്കേറ്റ് അംഗങ്ങളുടെ നേതൃത്വത്തില്‍ അടിയന്തിര പത്രസമ്മേളനം വിളിച്ചാണ് കാര്യങ്ങള്‍ വിശദീകരിച്ചത്.സര്‍വകലാശാലയ്ക്കു കീഴിലെ അറബിക് കോളജുകള്‍ നിര്‍ത്തലാക്കുന്നതിനായുള്ള സിന്‍ഡിക്കേറ്റ് നോട്ട് തയാറാക്കി ഇന്നു നടക്കുന്ന യോഗത്തില്‍ തീരുമാനമെടുക്കാനായിരുന്നു ശ്രമം. അതേസമയം അറബിക് കോളജുകള്‍ നിര്‍ത്തലാക്കാനുള്ള സിന്‍ഡിക്കേറ്റ് നീക്കത്തില്‍ പ്രതിഷേധിച്ച് എം.എസ്.എഫിന്റെ നേതൃത്വത്തില്‍ പ്രതിപക്ഷ വിദ്യാര്‍ഥി സംഘടനകളും അധ്യാപക സംഘടനകളും സര്‍വകലാശാലയിലേക്ക് ഇന്ന് പ്രതിഷേധ മാര്‍ച്ച് സംഘടിപ്പിക്കും.

 

അറബിക് കോളജുകള്‍ക്ക് നേരേയുള്ള ആസൂത്രിത നീക്കം ഉപേക്ഷിക്കണം: കെ.എ.എം.എ

തിരുവനന്തപുരം: സര്‍വകലാശാലകള്‍ക്കുകീഴില്‍ പ്രവര്‍ത്തിക്കുന്ന അറബിക്  കോളജുകളും അവിടങ്ങളിലെ അറബിക് കോഴ്‌സുകളും നിര്‍ത്തലാക്കാനുള്ള നീക്കം ഉപേക്ഷിക്കണമെന്ന് കേരള അറബിക് മുന്‍ഷിസ് അസോസിയേഷന്‍ (കെ.എ.എം.എ) സംസ്ഥാന സെക്രട്ടേറിയറ്റ് ആവശ്യപ്പെട്ടു. അറബിഭാഷയുടെയും അനുബന്ധ പഠന പ്രവര്‍ത്തനങ്ങളുടെയും പ്രോത്സാഹനാര്‍ഥം കാലിക്കറ്റ് സര്‍വകലാശാലയുടെ കീഴില്‍ വര്‍ഷങ്ങളായി പ്രവര്‍ത്തിച്ചുവരുന്ന അറബിക് കോളജുകള്‍ക്കും, കോഴ്‌സുകള്‍ക്കും എതിരായ ആസൂത്രിത നീക്കങ്ങള്‍ പ്രതിഷേധാര്‍ഹമാണെന്നും അത്തരം നീക്കങ്ങളില്‍ നിന്ന് സര്‍വകലാശാല പിന്മാറണമെന്നും കെ.എ.എം.എ ആവശ്യപ്പെട്ടു.

നീക്കം ചെറുക്കും: സി.കെ.സി.ടി

 

കോളജുകള്‍ക്കെതിരേ വര്‍ഷങ്ങളായി നടന്നു വരുന്ന ഇടതു ഗൂഢാലോചനയില്‍ ഇപ്പോള്‍ സംഘപരിവാറിനെ കൂടി കൂട്ടുപിടിച്ചിരിക്കുന്നു എന്നതിന്റെ തെളിവാണ് കോഴിക്കോട് സര്‍വകലാശാലയുടെ പുതിയ നീക്കം സൂചിപ്പിക്കുന്നതെന്നും കോണ്‍ഫെഡറേഷന്‍ ഓഫ് കേരള കോളജ് ടീച്ചേഴ്‌സ് (സി.കെ.സി.ടി.) സംസ്ഥാന സമിതി പ്രസ്താവിച്ചു.