ന്യൂഡൽഹി
12 മുതൽ 14 വയസ്സുവരെയുള്ളവർക്ക് നാളെ മുതൽ കൊവിഡ് വാക്‌സിനേഷൻ ആരംഭിക്കുമെന്ന് കേന്ദ്ര ആരോഗ്യ മന്ത്രി മൻസൂഖ് മാണ്ഡവ്യ അറിയിച്ചു.
അറുപത് വയസ്സിന് മുകളിൽ പ്രായമുള്ള എല്ലാവർക്കും നാളെ മുതൽ മുൻകരുതൽ ഡോസും നൽകും.
ഇതുവരെ 60 കഴിഞ്ഞ മറ്റു രോഗങ്ങളുള്ളവർക്ക് മാത്രമാണ് മുൻകരുതൽ ഡോസ് നൽകിയിരുന്നത്. ശാസ്ത്രീയ പഠനങ്ങളുടെയും കൂടിയാലോചനകളുടെയും അടിസ്ഥാനത്തിലാണ് 12 വയസ്സുമുതലുള്ളവർക്ക് വാക്‌സിൻ നൽകാൻ തീരുമാനിച്ചതെന്ന് കേന്ദ്ര ആരോഗ്യമന്ത്രാലയം വ്യക്തമാക്കി.
2008, 2009, 2010 വർഷങ്ങളിൽ ജനിച്ചവരെയാണ് ഈ വിഭാഗത്തിൽ ഉൾപ്പെടുത്തുക.
ഹൈദരാബാദ് ആസ്ഥാനമായുള്ള ബയോളജിക്കൽ-ഇ നിർമിക്കുന്ന കോർബെവാക്സ് വാക്സിനാണ് 12-14 വിഭാഗത്തിന് നൽകുന്നതെന്നും ആരോഗ്യമന്ത്രാലയം അറിയിച്ചു.
കഴിഞ്ഞ മാസം 21നാണ് കോർബെവാക്‌സിൻ 12 മുതൽ 18 വയസ്സ് വരെ പ്രായമുള്ളവരിൽ അടിയന്തര ഉപയോഗത്തിന് ഡ്രഗ്‌സ് കൺട്രോളർ ജനറൽ ഓഫ് ഇന്ത്യ അനുമതി നൽകിയത്.
ഇപ്പോൾ നടന്നുകൊണ്ടിരിക്കുന്ന കൊവിഡ് വാക്സിനേഷൻ യജ്ഞത്തിൽ 14 വയസ്സ് മുതലുള്ളവർക്ക് വാക്സിൻ നൽകി വരുന്നുണ്ട്.