കേരളം മുഴുവന്‍ പ്രതീക്ഷയര്‍പ്പിക്കുന്ന കേരള ബ്ലാസ്റ്റേഴ്‌സിന്റെ വിജയത്തിനായി ആവേശത്തോടെയും പ്രാര്‍ഥനയോടെയും കാത്തിരിക്കുകയാണ് ബ്ലാസ്‌റ്റേഴ്‌സ് താരം കെ.പി രാഹുലിന്റെ കുടുംബം.

മഞ്ഞപ്പട ആദ്യ കപ്പെടുക്കുമ്പോള്‍ കപ്പ് നേരില്‍ കാണാനും മഞ്ഞപ്പടയെ വരവേല്‍ക്കാനുമായി രാഹുലിന്റെ കുടുംബം കൊച്ചിയിലേക്ക് പുറപ്പെടാന്‍ തയാറാകുകയാണ്. രാഹുലിന്റെ ടീമിന്റെ വിജയം ഉത്സവമാക്കാനായി ഒരുക്കങ്ങളും തയാറാക്കി കാത്തിരിക്കുകയാണ് കുടുംബം.

തിരക്കുകള്‍ക്കിടയിലും വീട്ടിലേക്ക് ഫോണ്‍ ചെയ്തപ്പോള്‍ രാഹുലിന്റെ ശബ്ദത്തില്‍ കേട്ട ആത്മവിശ്വാസം തന്നെയാണ് കുടുംബത്തെ ആവേശം കൊള്ളിക്കുന്നത്. നല്ല കോച്ചും മികച്ച ടീമുമാണ് ബ്ലാസ്‌റ്റേഴ്‌സിനുള്ളതെന്ന കാര്യത്തില്‍ രാഹുലിന്റെ അച്ഛന് സംശയമില്ല. ഈ ഘടകങ്ങളെല്ലാം കണക്കിലെടുത്താണ് രാഹുലിന്റെ കുടുംബം വിജയമുറപ്പിച്ചിരിക്കുന്നത്.