തൃക്കരിപ്പൂര്‍: മാലിന്യമുക്ത കടല്‍ തീരം എന്ന ആശയവുമായി വലിയപറമ്പ തീരദേശ ജനതകൈകോര്‍ക്കുന്നു. ഈ മാസം 26നു വൈകീട്ട് മൂന്നിനു തീരത്തെ മുഴുവന്‍ മാലിന്യങ്ങളും നീക്കം ചെയ്യും. ഇതുസംബന്ധിച്ച് ഇന്നലെ പഞ്ചായത്തിലെ വിവിധ വാര്‍ഡുകളില്‍ സന്നദ്ധ സംഘടന, ക്ലബുകള്‍, സ്‌കൂള്‍ കുട്ടികള്‍ എന്നിവരെ പങ്കെടുപ്പിച്ച് വിപുലമായ യോഗം ചേര്‍ന്നു. പഞ്ചായത്തിന്റെ നേതൃത്വത്തില്‍ നടക്കുന്ന ശുചീകരണത്തില്‍ സ്‌കൂള്‍ കുട്ടികള്‍ 'മാലിന്യ മുക്ത തീരം'എന്ന പ്ലക്കാര്‍ഡുകളുമായി അണിനിരക്കും. മാവിലാക്കടപ്പുറം എം.എ.യു.പി സ്‌കൂളില്‍ നടന്ന യോഗത്തില്‍ പഞ്ചായത്ത് പ്രസിഡന്റ് എം.ടി അബ്ദുല്‍ ജബ്ബാര്‍ അധ്യക്ഷനായി. പഞ്ചായത്ത് അംഗം സുമാ കണ്ണന്‍, സുകുമാരന്‍, പ്രധാനധ്യാപകന്‍ റസാഖ് പുനത്തില്‍ പ്രസംഗിച്ചു.