തോട്ടട: വിദ്യാര്‍ഥികള്‍ സമൂഹ മാധ്യമങ്ങളില്‍ അധികസമയം ചെലവിടാതെ വീട്ടുകാരുമായി കൂടുതല്‍ സമയം ആശയവിനിമയം നടത്താന്‍ ശ്രമിക്കണമെന്ന് എക്‌സൈസ് കമ്മിഷണര്‍ ഋഷിരാജ് സിങ്. തോട്ടട എസ്.എന്‍ ട്രസ്റ്റ് ഹയര്‍ സെക്കന്‍ഡറി സ്‌കൂളിലെ ലഹരി വിരുദ്ധ പരിപാടിഉദ്ഘാടനം ചെയ്യുകയായിരുന്നു അദ്ദേഹം. കുട്ടികള്‍ വാട്‌സ് ആപ് അടക്കമുള്ള സമൂഹമാധ്യമങ്ങള്‍ ഉപയോഗിക്കുന്നത് പരമാവധി 20 മിനുട്ടില്‍ ഒതുക്കണം. വീട്ടുകാരുമായി കൂടുതല്‍ സമയം ചെലവിട്ടാല്‍ മാത്രമേ കുടുംബ ജീവിതം സുഖകരമാകൂവെന്നും അദ്ദേഹം പറഞ്ഞു. സ്‌കൂള്‍ പി.ടി.എ പ്രസിഡന്റ് എ.പി ഹരിതന്‍ അധ്യക്ഷനായി. പ്രിന്‍സിപ്പല്‍ ഡോ. ശിവദാസന്‍ തിരുമംഗലത്ത്, എക്‌സൈസ് ഡെപ്യൂട്ടി കമ്മിഷണര്‍ വി.പി സുരേന്ദ്രന്‍, എ.കെ സജിത്ത് സംസാരിച്ചു.