കണ്ണൂര്‍: രാത്രികാലങ്ങളില്‍ വാഹനവുമായി റോഡിലിറങ്ങുന്നവര്‍ നേരിടുന്ന പ്രധാന വെല്ലുവിളികളിലൊന്നാണ് എതിരേ വരുന്ന വാഹനങ്ങളുടെ ഹെഡ്‌ലൈറ്റ്. അനുവദനീയമല്ലാത്ത ലൈറ്റുകള്‍ വാഹനങ്ങളില്‍ ഉപയോഗിക്കുമ്പോഴും നഗ്‌നമായ ഈ നിയമലംഘനത്തിനെതിരേ അധികൃതര്‍ കണ്ണടയ്ക്കുന്നു. രാത്രിയുണ്ടാകുന്ന അപകടങ്ങള്‍ക്കു ഇത്തരം ഹൈ ബീം ഹെഡ്‌ലൈറ്റുകള്‍ക്കും പങ്കുണ്ടെന്ന് റിപ്പോര്‍ട്ടുകള്‍ തന്നെ പറയുന്നുണ്ട്. മുന്‍പ് ആഡംബരവാഹനങ്ങള്‍ മാത്രം ഉപയോഗിച്ചുവന്ന ഇത്തരം ലൈറ്റുകള്‍ ഇപ്പോള്‍ ഇരുചക്രവാഹനങ്ങളിലും അധികരിച്ചു വരികയാണ്.
ഹാലജന്‍ ലൈറ്റ് ഘടിപ്പിച്ച ബൈക്കുകളില്‍ ചീറിപ്പായുന്നവരില്‍ കൂടുതലും യുവാക്കളാണ്.
എതിരേ വരുന്ന വാഹനങ്ങള്‍ക്ക് ലൈറ്റ് ഡിം ചെയ്തുകൊടുക്കുന്നത് വളരെ ചെറിയ ശതമാനം ഡ്രൈവര്‍മാര്‍ മാത്രമാണ്. സാധാരണ വെളിച്ചം കണ്ണിലടിച്ചാല്‍പോലും വാഹനങ്ങള്‍ നിയന്ത്രണം വിട്ടേക്കാം. ഇതിനിടെയാണ് ഹാലജന്റെ കടന്നുവരവ്. നിരോധിച്ചിട്ടുണ്ടെങ്കിലും എയര്‍ഹോണ്‍  ഉപയോഗിക്കുന്ന വാഹനങ്ങളും ധാരാളമാണ്.
സ്വകാര്യബസുകള്‍ മരണപ്പാച്ചിലിനിടെ ഗതാഗതകുരുക്കില്‍ മുഴക്കുന്നത് എയര്‍ഹോണാണ്. ഇതിന്റെ കാതടപ്പിക്കുന്ന ശബ്ദം യാത്രക്കാരില്‍ അസ്വസ്ഥത സൃഷ്ടിക്കും. കഴിഞ്ഞ ദിവസം മോട്ടോര്‍വാഹന വകുപ്പ്  എയര്‍ഹോണിനെതിരേ നടപടിയാരംഭിച്ചുവെങ്കിലും പിന്നീട് ശോഷിച്ചു.