ഭോപാല്‍; ഹിജാബിനു പിന്നാലെ കാമ്പസിനുള്ളില്‍ വെച്ച് നിസ്‌ക്കരിക്കുന്നതും തടഞ്ഞ് ഹിന്ദുത്വര്‍. മധ്യപ്രദേശിലെ ഡോ. ഹരിസിങ് ഗോര്‍ കേന്ദ്ര സര്‍വ്വകലാശാലയിലാണ് സംഭവം. വിദ്യാര്‍ത്ഥിനി നിസ്‌ക്കരിക്കുന്നതിനിടെ ജയ്ശ്രിറാം മുഴക്കിയും മറ്റും ഇവര്‍ ബഹളം വെക്കുന്നതിന്റെ വീഡിയോയും പുറത്തു വന്നിട്ടുണ്ട്. ക്ലാസ് റൂമിനുള്ളില്‍ ഹിജാബ് ധരിച്ച പെണ്‍കുട്ടി നിസ്‌ക്കരിക്കുന്നതും വീഡിയോയില്‍ ദൃശ്യമാണ്. ക്ലാരിയോണ്‍ ഇന്ത്യയുടേതാണ് റിപ്പോര്‍ട്ട്.

പെണ്‍കുട്ടി നിസ്‌ക്കരിക്കുന്ന വീഡിയോ സോഷ്യല്‍ മീഡിയയില്‍ പ്രചരിച്ചതിന് പിന്നാലെ ഹിന്ദു ജാഗരണ്‍ മഞ്ചിന്റെ പ്രവര്‍ത്തകര്‍ കാമ്പസിലെത്തി. പ്രതിഷേധവും ആരംഭിച്ചു. ജയ്ശ്രീറാം മുഴക്കിയും ഹനുമാന്‍ ജല്‍സ ആലപിച്ചുമായിരുന്നു പ്രതിഷേധം. വിദ്യാര്‍ത്ഥിനിക്കെതിരെ നടപടിയെടുക്കണമെന്നാവശ്യപ്പെട്ട് ഇവര്‍ കോളജ് അധികൃതര്‍ക്ക് മെമ്മോറാണ്ടം നല്‍കിയതായും ക്ലാരിയോണിന്റെ റിപ്പോര്‍ട്ടില്‍ പറയുന്നു.

സര്‍വ്വകലാശാലയിലെ ചില ഫാക്കല്‍റ്റി അംഗങ്ങളുടെ നിര്‍ദ്ദേശപ്രകാരം ബോധപൂര്‍വമായ പ്രവൃത്തിയായിരുന്നു അത്. പെണ്‍കുട്ടിയെ നിസ്‌കരിക്കാന്‍ സഹായിച്ചവര്‍ക്കെതിരെ ശിക്ഷാനടപടി സ്വീകരിക്കണമെന്ന് ഞങ്ങള്‍ ആവശ്യപ്പെട്ടിട്ടുണ്ട്- ഹിന്ദു ജാഗരണ്‍ മഞ്ച് അംഗം കപില്‍ സ്വാമി പറയുന്നു. ഇവരുടെ നിര്‍ബന്ധത്തിന് വഴങ്ങി വൈസ് ചാന്‍സലര്‍ വിദ്യാര്‍ത്ഥിനി നിസ്‌ക്കരിച്ച സംഭവത്തില്‍ അന്വേഷണത്തിന് ഉത്തരവിട്ടിട്ടുണ്ട്.

ഇതേക്കുറിച്ച് അന്വേഷിക്കാന്‍ അഞ്ചംഗ സമിതിയെ നിയോഗിച്ചിട്ടുണ്ട്. സമിതി മൂന്ന് ദിവസത്തിനകം റിപ്പോര്‍ട്ട് സമര്‍പ്പിക്കും, ഈ റിപ്പോര്‍ട്ടിന്റെ അടിസ്ഥാനത്തില്‍ തുടര്‍നടപടി സ്വീകരിക്കും. എല്ലാ വിദ്യാര്‍ത്ഥികളോടും യൂണിവേഴ്‌സിറ്റി കാമ്പസിന് പുറത്ത് അവരുടെ മതപരമായ ആചാരങ്ങള്‍ പിന്തുടരാന്‍ ഞങ്ങള്‍ ആവശ്യപ്പെട്ടിട്ടുണ്ട്- വൈസ് ചാന്‍സലര്‍ വിശദീകരിക്കുന്നു.