സ്വന്തം ലേഖകൻ
തിരുവനന്തപുരം
സിൽവർ ലൈൻ പദ്ധതിക്കെതിരേ യു.ഡി.എഫും ബി.ജെ.പിയും വ്യാജപ്രചാരണങ്ങൾ നടത്തുകയാണെന്ന് ഇടതുമുന്നണി കൺവീനർ എ. വിജയരാഘവൻ. പദ്ധതിയെ സംബന്ധിച്ച് ജനങ്ങൾക്കിടയിൽ ബോധവൽക്കരണം നടത്തും.
ഗൃഹസന്ദർശനമടക്കമുള്ള ജനസമ്പർക്ക പരിപാടികൾ സംഘടിപ്പിക്കും. ഇതിന്റെ ഭാഗമായി അടുത്ത മാസം 19നു തിരുവനന്തപുരത്ത് മുഖ്യമന്ത്രി പിണറായി വിജയനും ഇടതുനേതാക്കളും പങ്കെടുക്കുന്ന വിപുലമായ പ്രചാരണ പരിപാടി സംഘടിപ്പിക്കുമെന്നും ഇടതുമുന്നണി യോഗത്തിനു ശേഷം എ. വിജയരാഘവൻ പത്രസമ്മേളനത്തിൽ പറഞ്ഞു.
എല്ലാ ജില്ലാ കേന്ദ്രങ്ങളിലും പ്രാദേശികമായി സിൽവർ ലൈനുമായി ബന്ധപ്പെട്ട് പ്രചാരണ പരിപാടി സംഘടിപ്പിക്കും. തദ്ദേശ സ്വയംഭരണ സ്ഥാപനങ്ങളുടെ പങ്കാളിത്തത്തോടുകൂടിയായിരിക്കും പ്രചാരണമെന്നും വിജയരാഘവൻ വ്യക്തമാക്കി.
ബസ് ചാർജ്, ഓട്ടോ-ടാക്‌സി നിരക്കുകൾ വർധിപ്പിക്കാൻ ഇന്നലെ ചേർന്ന ഇടതുമുന്നണി യോഗം സർക്കാരിന് അനുമതി നൽകി. പെട്രോൾ-ഡീസൽ വില വർധനവിൽ പ്രതിഷേധിച്ചു 21നു എല്ലാ നിയോജക മണ്ഡലങ്ങളിലും പ്രതിഷേധ പരിപാടികൾ സംഘടിപ്പിക്കുമെന്നും അദ്ദേഹം പറഞ്ഞു. മദ്യ നയത്തിൽ കാതലായ മാറ്റങ്ങൾ വരുത്താത്ത സാഹചര്യത്തിൽ മുന്നണി യോഗം അക്കാര്യം ചർച്ച ചെയ്തില്ലെന്നും വിജയരാഘവൻ പറഞ്ഞു.
തിടുക്കം
ഗുണകരമാവില്ലെന്ന് സി.പി.ഐ; ധൃതിയില്ലെന്ന് മുഖ്യമന്ത്രി
തിരുവനന്തപുരം
സിൽവർ ലൈൻ പദ്ധതി ഇത്ര തിടുക്കത്തിൽ നടപ്പാക്കാൻ ശ്രമിക്കുന്നത് സർക്കാരിനു ഗുണകരമാകില്ലെന്നു സി.പി.ഐ. ഇന്നലെ ചേർന്ന ഇടതുമുന്നണി യോഗത്തിലാണ് നിലപാടെടുത്തത്. കല്ലിടൽ നടക്കുന്ന സ്ഥലങ്ങളിലെ സമരവും അതിനെ തുടർന്നുണ്ടാകുന്ന ക്രമസമാധാന പ്രശ്‌നങ്ങളും ജനങ്ങളെ സർക്കാരിന് എതിരാക്കുകയാണ്. അതുകൊണ്ട് പദ്ധതിയുടെ വേഗംകുറച്ചു ജനങ്ങൾക്കിടയിൽ ബോധവൽക്കരണം നടത്തിയ ശേഷം വേഗത കൂട്ടുന്നതാണു നല്ലതെന്നും സി.പി.ഐ നേതാക്കൾ യോഗത്തിൽ പറഞ്ഞു.
എന്നാൽ ഇക്കാര്യത്തിൽ സർക്കാരിനു ധൃതിയില്ലെന്നു പറഞ്ഞ മുഖ്യമന്ത്രി പിണറായി വിജയൻ സിൽവർ ലൈൻ ഇടതുമുന്നണിയുടെ പ്രകടന പത്രികയിൽ പറഞ്ഞ അഭിമാന പദ്ധതിയാണെന്നും വ്യക്തമാക്കി. പദ്ധതി നടപ്പാക്കരുതെന്നല്ല, ജനങ്ങളെ ബോധ്യപ്പെടുത്തി മുന്നോട്ടു പോകണമെന്നാണ് ഉദ്ദേശിച്ചതെന്നു സി.പി.ഐ നേതാക്കൾ മുഖ്യമന്ത്രിയ്ക്കു മറുപടിയായി പറഞ്ഞു.