തിരുവനന്തപുരം: സംസ്ഥാനത്തെ സര്‍ക്കാര്‍ ഓഫിസുകളുടെ പ്രവര്‍ത്തിദിനം അഞ്ചാക്കി വെട്ടിച്ചുരുക്കി ശനിയാഴ്ച അവധി നല്‍കുന്നതിനെ തത്വത്തില്‍ അംഗീകരിച്ച് സര്‍വിസ് സംഘടനകള്‍.  ചീഫ് സെക്രട്ടറി വിളിച്ചുചേര്‍ത്ത ഓണ്‍ലൈന്‍ യോഗത്തിലാണ് ഭരണ-പ്രതിപക്ഷ സര്‍വിസ് സംഘടനകള്‍ ഒന്നടങ്കം നിര്‍ദേശം സ്വാഗതം ചെയ്തത്. 

എന്നാല്‍ ആരോഗ്യവകുപ്പിലെ സംഘടനകള്‍ ഇതുസംബന്ധിച്ച നിര്‍ദേശങ്ങളില്‍ അവരുടെ ആശങ്ക അറിയിച്ചു. പ്രത്യേക ജോലി സാഹചര്യം കണക്കിലെടുത്ത് ആരോഗ്യ വകുപ്പിലെ ജീവനക്കാരുടെ കാര്യത്തില്‍ പ്രത്യേക തീരുമാനം വേണമെന്നും യോഗത്തില്‍ അഭിപ്രായം ഉയര്‍ന്നു. പ്രവര്‍ത്തിദിനം അഞ്ചാക്കി വെട്ടിച്ചുരുക്കുന്ന കാര്യത്തില്‍ പ്രാഥമിക ചര്‍ച്ചയും അഭിപ്രായ ശേഖരണവുമാണ് നടത്തുന്നതെന്നായിരുന്നു ചീഫ് സെക്രട്ടറി യോഗത്തെ അറിയിച്ചത്. സര്‍ക്കാരുമായി ആലോചിച്ച ശേഷം അവധി അടക്കമുള്ള കാര്യങ്ങളില്‍ ആവശ്യമെങ്കില്‍ തുടര്‍ ചര്‍ച്ചയാകാമെന്നും ചീഫ് സെക്രട്ടറി യോഗത്തെ അറിയിച്ചു. 

ALSO READ: വലിച്ചെറിഞ്ഞ മാലിന്യം ഖജനാവിലെത്തിച്ചത് 8.89 കോടി രൂപ; കൂടുതല്‍ കേസുകള്‍ തിരുവനന്തപുരത്ത്

അതേസമയം, പ്രവര്‍ത്തിദിനം വെട്ടിച്ചുരുക്കുന്നതിനെ സ്വാഗതം ചെയ്തെങ്കിലും കാഷ്വല്‍ ലീവ് ഉള്‍പ്പടെയുള്ള മറ്റ് അവകാശങ്ങള്‍ കവര്‍ന്നെടുക്കാന്‍ അനുവദിക്കില്ലെന്ന് സംഘടനകള്‍ നിലപാട് വ്യക്തമാക്കി. കേന്ദ്ര സര്‍വിസില്‍ കാഷ്വല്‍ ലീവ് എട്ടാണെന്നും സംസ്ഥാന സര്‍വിസില്‍ 20 കാഷ്വല്‍ ലീവുണ്ടെന്നുമുള്ള പരാമര്‍ശം പൊതുഭരണ വകുപ്പ് സെക്രട്ടറിയുടെ ഭാഗത്ത് നിന്നുമുണ്ടായപ്പോഴാണ് കാഷ്വല്‍ ലീവ് വെട്ടിച്ചുരുക്കാന്‍ കഴിയില്ലെന്ന നിലപാട് സര്‍വിസ് സംഘടനകളും വ്യക്തമാക്കിയത്. 

നിലവില്‍ 42 മണിക്കൂറാണ് ആഴ്ചയിലെ പ്രവൃത്തി സമയം. ഒരു ദിവസം കുറയ്ക്കുമ്പോള്‍ ആഴ്ചയില്‍ ഏഴ് മണിക്കൂറിന്റെയും മാസത്തില്‍ 21 മണിക്കൂറിന്റെയും വര്‍ഷത്തില്‍ 36 ദിവസത്തെയും കുറവുണ്ടാകും. പ്രവര്‍ത്തിദിനം കുറയ്ക്കുമ്പോള്‍ പകരമായി ദിവസം അധിക പ്രവര്‍ത്തിസമയം എന്നുമുള്ള നിര്‍ദേശം സംഘടനകള്‍ മുന്നോട്ടുവച്ചു. കൂടാതെ ദൂര സ്ഥലങ്ങളില്‍ നിന്നുമെത്തുന്ന ജീവനക്കാര്‍ക്കായി ഫ്ളെക്സി ടൈം എന്ന നിര്‍ദേശവും യോഗത്തിലുയര്‍ന്നു. രാവിലെ താമസിച്ച് വരുന്ന ജീവനക്കാര്‍ക്ക് വൈകുന്നേരം അധിക സമയം ജോയി ചെയ്യാന്‍ അനുവദിക്കുന്നതാണ് ഈ നിര്‍ദേശം.

Service organisations representing government employees in Kerala have, in principle, agreed to the state government’s proposal to introduce a five-day work week for government offices by granting Saturdays as holidays.