മസ്‌കത്ത്: 2025 സാമ്പത്തിക വര്‍ഷത്തില്‍ ഒമാനിലെ നികുതി വരുമാനം ഇതുവരെ രേഖപ്പെടുത്തിയതില്‍ ഏറ്റവും ഉയര്‍ന്ന നിലയിലെത്തി. ടാക്‌സ് അതോറിറ്റി പുറത്തുവിട്ട ഔദ്യോഗിക കണക്കുകള്‍ പ്രകാരം, കഴിഞ്ഞ വര്‍ഷം ഒമാന്‍ സര്‍ക്കാര്‍ മൊത്തം 1.3 ബില്യണ്‍ ഒമാനി റിയാല്‍ നികുതി വരുമാനം സമാഹരിച്ചു. ആദായ നികുതിയും മൂല്യവര്‍ധിത നികുതിയും (വാറ്റ്) ഉള്‍പ്പെടെയുള്ള പ്രധാന നികുതി ഇനങ്ങളില്‍ ഉണ്ടായ സ്ഥിരമായ വളര്‍ച്ചയാണ് ഈ റെക്കോര്‍ഡ് നേട്ടത്തിന് പിന്നിലെന്നാണ് അധികൃതരുടെ വിലയിരുത്തല്‍.

വിവരങ്ങള്‍ പ്രകാരം, 2025ല്‍ ആദായ നികുതിയിലൂടെ 658 മില്യണ്‍ ഒമാനി റിയാല്‍, വാറ്റ് വഴിയിലൂടെ 631 മില്യണ്‍ ഒമാനി റിയാല്‍, എക്‌സൈസ് നികുതിയിലൂടെ 84 മില്യണ്‍ ഒമാനി റിയാല്‍ എന്നിങ്ങനെയാണ് സര്‍ക്കാര്‍ ഖജനാവിലേക്ക് എത്തിയത്. എണ്ണവരുമാനത്തോട് ബന്ധമില്ലാത്തത് ശക്തിപ്പെടുത്തുകയെന്ന സര്‍ക്കാര്‍ നയങ്ങള്‍ ഫലപ്രദമായി നടപ്പാക്കപ്പെട്ടതിന്റെ വ്യക്തമായ സൂചനയാണിതെന്ന് സാമ്പത്തിക മേഖല വിലയിരുത്തുന്നു.

നികുതി രജിസ്‌ട്രേഷനിലും വലിയ മുന്നേറ്റമാണ് 2025ല്‍ ഉണ്ടായത്. 2021നോട് താരതമ്യം ചെയ്യുമ്പോള്‍, ആദായ നികുതി രജിസ്‌ട്രേഷന്‍ 88 ശതമാനവും, വാറ്റ് രജിസ്‌ട്രേഷന്‍ 120 ശതമാനവും, എക്‌സൈസ് നികുതി രജിസ്‌ട്രേഷന്‍ 222 ശതമാനവും വര്‍ധിച്ചതായി ടാക്‌സ് അതോറിറ്റി അറിയിച്ചു. കൂടുതല്‍ സ്ഥാപനങ്ങളും വ്യാപാരങ്ങളും ഔപചാരിക നികുതി സംവിധാനത്തിന്റെ ഭാഗമാകുന്ന പ്രവണതയാണ് ഇതിലൂടെ വ്യക്തമാകുന്നത്.

നികുതി ശേഖരണം കൂടുതല്‍ കാര്യക്ഷമവും സുതാര്യവുമാക്കുന്നതിനായി ഇഇന്‍വോയ്‌സിംഗ് സംവിധാനം, ഡിജിറ്റല്‍ നിരീക്ഷണം, റിസ്‌ക് അധിഷ്ഠിത പരിശോധനകള്‍ തുടങ്ങിയ ആധുനിക സംവിധാനങ്ങള്‍ വ്യാപകമായി നടപ്പിലാക്കിയതായും അധികൃതര്‍ വ്യക്തമാക്കി. ഇതുവഴി നികുതി നിയമങ്ങള്‍ കൃത്യമായി പാലിക്കുന്നതില്‍ ഗണ്യമായ പുരോഗതി കൈവരിക്കാന്‍ സാധിച്ചുവെന്നും ടാക്‌സ് അതോറിറ്റി അറിയിച്ചു.

ALSO READ: ഒമാനിൽ വിവാഹപൂർവ മെഡിക്കൽ പരിശോധന നിർബന്ധമാക്കി; നിയമം ലംഘിച്ചാൽ വിവാഹ കരാർ അസാധുവാകും

അതേസമയം, അന്താരാഷ്ട്ര നിക്ഷേപം ആകര്‍ഷിക്കുന്നതിന്റെ ഭാഗമായി വിവിധ രാജ്യങ്ങളുമായി ഡബിള്‍ ടാക്‌സേഷന്‍ ഒഴിവാക്കല്‍ കരാറുകള്‍ ഒമാന്‍ തുടരുകയാണ്. നിലവില്‍ ഏകദേശം 39 രാജ്യങ്ങളുമായി ഇത്തരം കരാറുകള്‍ നിലവിലുണ്ടെന്നും, ഇത് നികുതി സുതാര്യതയും രാജ്യാന്തര സാമ്പത്തിക സഹകരണവും ശക്തിപ്പെടുത്താന്‍ സഹായിക്കുന്നതായും അധികൃതര്‍ പറഞ്ഞു.

എണ്ണവരുമാനത്തെ മാത്രം ആശ്രയിക്കാതെ, ശക്തവും സ്ഥിരതയുള്ളതുമായ സമഗ്ര സാമ്പത്തിക അടിത്തറ രൂപപ്പെടുത്തുക എന്ന ഒമാന്റെ ദീര്‍ഘകാല വികസന ലക്ഷ്യങ്ങളുടെ ഭാഗമായാണ് നികുതി മേഖലയിലെ ഈ മുന്നേറ്റമെന്ന് സാമ്പത്തിക വിദഗ്ധര്‍ വിലയിരുത്തുന്നു.

Oman’s tax revenue crossed RO 1.3 billion in 2025, driven by strong growth in income tax, VAT and excise collections, according to the Tax Authority.