മുംബൈ: ആക്ടിവിസ്റ്റ് നരേന്ദ്ര ധബോല്‍ക്കറുടെ കൊലപാതക കേസ് അന്വേഷണം പൂര്‍ത്തിയായെന്ന് സി.ബി.ഐ ബോംബെ ഹൈക്കോടതിയെ അറിയിച്ചു. തിങ്കളാഴ്ച അന്തിമ റിപ്പോര്‍ട്ട് സമര്‍പ്പിച്ചു. അന്വേഷണം പൂര്‍ത്തിയായോ എന്ന വിവരം മൂന്നാഴ്ചയ്ക്കകം അറിയിക്കാന്‍ ഹൈക്കോടതി ഈ മാസം ആദ്യം സി.ബി.ഐയോട് ആവശ്യപ്പെട്ടിരുന്നു. കേസില്‍ ബോംബെ ഹൈക്കോടതിയുടെ നിരീക്ഷണം തുടരണമെന്ന് ആവശ്യപ്പെട്ട് നരേന്ദ്ര ധബോല്‍ക്കറുടെ മകള്‍ മുക്ത ധബോല്‍ക്കര്‍ സമര്‍പ്പിച്ച ഹരജിയാണ് ഹൈക്കോടതി പരിഗണിക്കുന്നത്.

ജസ്റ്റിസുമാരായ അജയ് എസ്. ഗഡ്കരി, പ്രകാശ് ഡി. നായിക് എന്നിവരടങ്ങിയ ബെഞ്ചാണ് ഹരജി പരിഗണിച്ചത്. 67 കാരനായ ധബോല്‍ക്കര്‍ 2013 ഓഗസ്റ്റില്‍ പൂനെയില്‍ വച്ചാണ് വെടിയേറ്റു മരിച്ചത്. പൂനെ പൊലിസ് കേസന്വേഷിച്ചെങ്കിലും 2014ല്‍ കേസ് സി.ബി.ഐക്ക് കൈമാറാന്‍ കോടതി ഉത്തരവിടുകയായിരുന്നു. സി.ബി.ഐ അന്വേഷണം തൃപ്തികരമല്ലെന്നും നിരവധി വീഴ്ചകളുണ്ടെന്നും മുക്ത ധബോല്‍ക്കറുടെ അഭിഭാഷകന്‍ കോടതിയെ അറിയിച്ചു. കേസില്‍ അഞ്ച് പ്രതികള്‍ക്കെതിരേ സി.ബി.ഐ കുറ്റപത്രം സമര്‍പ്പിച്ചിരുന്നു.

കുറ്റമറ്റ രീതിയിലാണ് കേസന്വേഷണമെന്നും അന്വേഷണം പൂര്‍ത്തിയായെന്നും സി.ബി.ഐക്ക് വേണ്ടി ഹാജരായ അഡീഷണല്‍ സോളിസിറ്റര്‍ ജനറല്‍ അനില്‍ സിങ് കോടതിയെ അറിയിച്ചു. 32 സാക്ഷികളില്‍ 15 പേരെ വിസ്തരിച്ചുവെന്നും അദ്ദേഹം ബോധിപ്പിച്ചു. തുടര്‍ന്ന് കൂടുതല്‍ അന്വേഷണം ആവശ്യമുണ്ടോയെന്ന് സി.ബി.ഐയോട് കോടതി ആരാഞ്ഞപ്പോള്‍ അന്വേഷണ ഉദ്യോഗസ്ഥന്‍ റിപ്പോര്‍ട്ട് സമര്‍പ്പിച്ചിട്ടുണ്ടെന്നും ബന്ധപ്പെട്ട അതോറിറ്റിയുടെ മുമ്പാകെയുള്ളതിനാല്‍ അതിന്റെ ആവശ്യമില്ലെന്നും അനില്‍ സിങ് അറിയിക്കുകയായിരുന്നു. തുടര്‍ന്ന് അന്തിമ റിപ്പോര്‍ട്ട് സമര്‍പ്പിക്കാന്‍ എത്ര സമയമെടുക്കുമെന്ന് അറിയിക്കാന്‍ കോടതി സി.ബി.ഐയോട് ആവശ്യപ്പെട്ടു. സി.ബി.ഐക്ക്് മൂന്നാഴ്ചത്തെ സമയം നല്‍കണമെന്ന് സിങ് അഭ്യര്‍ഥിക്കുകയായിരുന്നു.