തിരുവനന്തപുരം: പ്രതിപക്ഷ പാര്‍ട്ടി പ്രവര്‍ത്തകര്‍ക്കെതിരേ നടക്കുന്ന പൊലിസ് അതിക്രമങ്ങള്‍ക്കെതിരേ നടപടി ആവശ്യപ്പെട്ട് മുസ്ലിം ലീഗ് എംഎല്‍.എമാര്‍ മുഖ്യമന്ത്രിയെ സന്ദര്‍ശിച്ചു. ജനാധിപത്യ മര്യാദകള്‍ക്ക് നിരക്കാത്ത വേട്ടയാടലാണ് പൊലിസിന്റെ ഭാഗത്തു നിന്നും ഉണ്ടാകുന്നതെന്നും പ്രവര്‍ത്തകര്‍ക്കെതിരേ തുടര്‍ച്ചയായി കേസുകള്‍ എടുത്തും പൊതുപ്രവര്‍ത്തനം തടസപ്പെടുത്തുന്ന രീതിയില്‍ നടപടികളെടുത്തും പോലീസ് ഭീതി സൃഷ്ടിക്കുകയാണെന്ന് മുഖ്യമന്ത്രിയെ എം.എല്‍.എമാര്‍ ആരോപിച്ചു.

കെ.പി.എ മജീദ്, പി. അബ്ദുല്‍ ഹമീദ്, അഡ്വ. സൈനുല്‍ ആബിദീന്‍ തങ്ങള്‍, ടി.വി ഇബ്രാഹീം, പി.കെ ബശീര്‍, എന്‍.ശംസുദ്ദീന്‍, നജീബ് കാന്തപുരം, എ.കെ.എം അശ്‌റഫ് എന്നിവര്‍ സംബന്ധിച്ചു. കാര്യങ്ങള്‍ മുഖ്യമന്ത്രിയെ ബോധ്യപ്പിച്ചെന്നും അദ്ദേഹത്തിന്റെ ഭാഗത്തു നിന്നും കാര്യങ്ങള്‍ നോക്കാമെന്ന ഉറപ്പ് ലഭിച്ചിട്ടുണ്ടെന്നും എം.എല്‍.എമാര്‍ അറിയിച്ചു.