ജിദ്ദ: അടുത്ത മാസം സഊദിയിലേക്കുള്ള അന്താരാഷ്ട്ര വിമാന സർവീസുകൾ പുനരാരംഭിക്കുന്നതിനുള്ള തയ്യാറെടുപ്പുകൾ അധികൃതർ ചർച്ച ചെയ്തു.
സഊദി ഗതാഗത മന്ത്രി സാലിഹ് അൽ ജാസറിന്റെ നേതൃത്വത്തിലുള്ള സഊദി എയർലൈൻസ് ജനറൽ ഓർഗനൈസേഷന്റെ ഡയറക്ടർ ബോർഡാണു അടുത്ത മാസം വിമാന സർവീസുകൾ പുനരാരംഭിക്കുന്നത് സംബന്ധിച്ച് ഒരുക്കങ്ങൾ ചർച്ച ചെയ്തത്.
സഊദിയ പ്രവര്‍ത്തന റിപ്പോര്‍ട്ട്, സേവനം മെച്ചപ്പെടുത്തല്‍ എന്നിവയുമായി ബന്ധപ്പെട്ട ഏതാനും വിഷയങ്ങളും കഴിഞ്ഞ ദിവസം ചേര്‍ന്ന ഡയറക്ടര്‍ ബോര്‍ഡ് യോഗം വിശകലനം ചെയ്തു.
സ്വദേശികള്‍ക്കുള്ള വിദേശയാത്രാ വിലക്ക് എടുത്തുകളയുകയും കരാതിര്‍ത്തി പോസ്റ്റുകളും തുറമുഖങ്ങളും എയര്‍പോര്‍ട്ടുകളും പൂര്‍ണ തോതില്‍ തുറക്കുകയും ചെയ്യുന്ന തീയതിയില്‍ ജനുവരി 29 ന് ആഭ്യന്തര മന്ത്രാലയം മാറ്റംവരുത്തിയിരുന്നു.
പുതിയ തീരുമാനം അനുസരിച്ച് മെയ് 17 മുതലാണ് സ്വദേശികള്‍ക്കുള്ള വിദേശയാത്രാ വിലക്ക് എടുത്തുകളയുകയും കരാതിര്‍ത്തി പോസ്റ്റുകളും തുറമുഖങ്ങളും എയര്‍പോര്‍ട്ടുകളും പൂര്‍ണ തോതില്‍ തുറക്കുകയും ചെയ്യുക.
അതേസമയം, ഇന്ത്യയില്‍
കൊവിഡ് കേസുകള്‍ വന്‍തോതില്‍ വർധിക്കുന്ന പശ്ചാത്തലത്തില്‍ ഇന്ത്യയിലേക്കുള്ള സർവീസുകളും മെയ് 17 മുതല്‍ ആരംഭിക്കുമോ എന്ന കാര്യത്തില്‍ ആശങ്കയുണ്ട്. നിലവില്‍ ഇന്ത്യിലേക്കും തിരിച്ചും സർവീസുകള്‍ക്ക് എയർ ബബിള്‍ കരാർ പോലും നിലവിലില്ല.
അതേ സമയം ഇന്ത്യയിൽ നിന്ന് നേരിട്ടുള്ള വിമാന സർവീസുകൾക്ക് അനുമതി നൽകുമോ എന്ന കാര്യത്തിൽ യാതൊരു ഉറപ്പും ലഭിക്കാത്തതിനാൽ വിവിധ രാജ്യങ്ങളിൽ 14 ദിവസം താമസിച്ച ശേഷം സഊദിയിലേക്ക് മടങ്ങുന്നവരുടെ എണ്ണം വർദ്ധിച്ച് കൊണ്ടിരിക്കുകയാണ്.