ചേവായൂര്‍:  കോവൂര്‍- പാലാഴി എം.എല്‍.എ റോഡ് പൊട്ടിപ്പൊളിഞ്ഞ ഭാഗം താല്‍ക്കാലികമായി കോഴി വെയ്സ്റ്റ്  ഉപയോഗിച്ച് കുഴികള്‍ നികത്തി ഗതാഗത യോഗ്യമാക്കി തുടങ്ങി.
ഉമ്മളത്തൂര്‍താഴം മുതല്‍ അത്താണി വരെ  അഴുക്കുചാല്‍ ഇല്ലാത്തതിനാല്‍ വെള്ളം കയറിയതിനെതത്തുടര്‍ന്നാണ് റോഡ് പൊളിഞ്ഞത്.
ഈ വാര്‍ത്ത നേരത്തെ സുപ്രഭാതം റിപ്പോര്‍ട്ട് ചെയ്തിരുന്നു. അഴുക്കുചാല്‍ ഇല്ലാത്ത ഭാഗത്ത് അഴുക്കുചാലും  ആവശ്യമായ കലുങ്കുകളും നിര്‍മിക്കുന്നതിന് പദ്ധതി സമര്‍പ്പിച്ചിട്ടുണ്ടെന്നും അനുമതി ലഭിക്കുന്ന മുറയ്ക്ക്  പ്രവൃത്തി ആരംഭിക്കുമെന്നും പൊതുമരാമത്ത് വിഭാഗം അസി. എഞ്ചിനീയര്‍ രഞ്ജി  സുപ്രഭാതത്തോട് പറഞ്ഞു.
അഴുക്കുചാല്‍ അത്താണിക്കല്‍ പഞ്ചായത്ത് റോഡ് വഴി മാമ്പുഴയുമായി  ബന്ധിപ്പിക്കുകയാണെങ്കില്‍ തങ്ങളുടെ കൈവശമുള്ള സ്ഥലം വിട്ടുനല്‍കാന്‍ തയാറാണെന്ന് പാലാഴി ഹിറാ മസ്ജിദ് ഭാരവാഹികളും അറിയിച്ചു. എന്നാല്‍ അത്താണി ഭാഗത്തെ വെള്ളക്കെട്ടിന് ശാശ്വത പരിഹാരമാവുമെന്നും അവര്‍ പറഞ്ഞു.