യു.എച്ച് സിദ്ദീഖ്
തേഞ്ഞിപ്പലം
വേനൽ മഴയും കനത്ത കാറ്റും വീശിയടിച്ച സായാഹ്നത്തിൽ ട്രാക്കിലും പിറ്റിലും പൊന്നിൽ കുളിച്ച് മലയാളി താരങ്ങൾ. മൂന്ന് സ്വർണവും ഒരു വെള്ളിയും രണ്ടു വെങ്കലവുമായി ദേശീയ ഫെഡറേഷൻ കപ്പ് സീനിയർ അത്ലറ്റിക്സ് ചാംപ്യൻഷിപ്പിൻ്റെ സമാപനദിനം കേരള താരങ്ങൾ അവിസ്മരണീയമാക്കി. എം.പി ജാബിറും ആർ. അനുവും എൽദോസ് പോളുമാണ് പൊൻതാരങ്ങളായത്. വെള്ളിത്തിളക്കത്തിൽ ആർ. ആരതിയും വെങ്കലശോഭയിൽ മുഹമ്മദ് അജ്മലും യു. കാർത്തിക്കും കേരളത്തെ പതക്കമണിയിച്ചു. ചാംപ്യൻഷിപ്പിൻ്റെ അവസാന ദിനം മഴയിൽ കുതിർന്നു. ശക്തമായ കാറ്റും മഴയും ഒരു മണിക്കൂറിലേറെ മത്സരങ്ങൾ തടസപ്പെടുത്തി. മഴയിലും കാറ്റിലും സ്റ്റേഡിയത്തിലെ താൽക്കാലിക പവലിയനുകൾ തകർന്നു. ഇലക്ട്രോണിക് സംവിധാനങ്ങൾ തകരാറിലായി. മഴ ഒഴിഞ്ഞതോടെ മത്സരങ്ങൾ പൂർത്തിയാക്കാൻ കഴിഞ്ഞത് സംഘാടകർക്ക് ആശ്വാസമായി.