എറണാകുളം: മുഖ്യമന്ത്രി പിണറായി വിജയന് നേരെ വീണ്ടും കരിങ്കൊടി പ്രതിഷേധം. കളമശ്ശേരി മെഡിക്കല്‍ കോളജ് വിവാദവുമായി ബന്ധപ്പെട്ടാണ് യൂത്ത് കോണ്‍ഗ്രസ് പ്രവര്‍ത്തകര്‍ കരിങ്കൊടി കാട്ടിയത്.എറണാകുളം അങ്കമാലിയില്‍വെച്ചായിരുന്നു മുഖ്യമന്ത്രിയുടെ വാഹനത്തിന് നേരെ കരിങ്കൊടി പ്രതിഷേധം.

കളമശേരിയില്‍ നിന്നും അങ്കമാലിയിലേക്ക് പോവുകയായിരുന്നു മുഖ്യമന്ത്രി. സമീപത്തുള്ള കടയുടെ പാര്‍ക്കിങില്‍ കാത്തുനിന്ന പ്രവര്‍ത്തകര്‍ മുഖ്യമന്ത്രിയുടെ വാഹനവ്യൂഹത്തിന്റെ ശബ്ദം കേട്ടതിന് തൊട്ടുപിന്നാലെ റോഡിലേക്ക് ഓടിക്കയറുകയായിരുന്നു.

ആണ്‍കുട്ടികളെ പിടിച്ചു മാറ്റാന്‍ പൊലീസുകാരുണ്ടായിരുന്നെങ്കിലും വനിതാ പൊലീസുകാരില്ലാതിരുന്നതിനാല്‍ പ്രതിഷേധിച്ച വനിതാ പ്രവര്‍ത്തകയെ അറസ്റ്റ് ചെയ്തു നീക്കാന്‍ വൈകി. അതുകൊണ്ടു തന്നെ വാഹനവ്യൂഹം കടന്നു പോകുന്നത് വരെ പ്രതിഷേധിക്കാന്‍ പ്രവര്‍ത്തകര്‍ക്കായി.