വാഴക്കാട്: കൊവിഡ് പ്രതിസന്ധിയിലും ശമ്പളമില്ലാതെ എയ്ഡഡ് കോളജുകളിലെ ഗസ്റ്റ് അധ്യാപകര്‍.
10 മാസമായി ഇവര്‍ക്ക് ശമ്പളം ലഭിച്ചിട്ട്. കോളജുകളിലെ ക്ലാസുകള്‍ ഡിസംബര്‍ വരെ ഓണ്‍ലൈനിലും ജനുവരി മുതല്‍ ഓഫ് ലൈനിലുമാണ് നടന്നത്.

രണ്ടായിരത്തോളം ഗസ്റ്റ് അധ്യാപകര്‍ കേരളത്തിലെ വിവിധ കോളജുകളില്‍ ജോലി ചെയ്യുന്നു. ഇന്റേണല്‍ പരീക്ഷകളും വിവിധ സെമസ്റ്റര്‍ പരീക്ഷകളും ഇതിനകം നടന്നു. ഇതിന്റെയൊക്കെ ജോലിഭാരവും ഗസ്റ്റ് അധ്യാപകര്‍ക്കാണ്. എന്നിട്ടും ഈ അധ്യയന വര്‍ഷത്തെ ശമ്പളം എയ്ഡഡ് കോളജുകളിലെ അധ്യാപകര്‍ക്ക് ലഭിച്ചിട്ടില്ല. അതേസമയം സര്‍ക്കാര്‍ കോളജുകളിലെ ഗസ്റ്റ് അധ്യാപകര്‍ക്ക് ഇതിനകം ശമ്പളം ലഭിച്ചിട്ടുമുണ്ട്.അസംഘടിതരായതിനാല്‍ കോളജിലെ ഗസ്റ്റ് അധ്യാപകരുടെ വിഷയത്തില്‍ ആരും ഇടപെടുന്നില്ലെന്നാണ് പരാതി.