കാസര്‍കോട്: കാസര്‍കോട് ജില്ലയില്‍ മുഖ്യമന്ത്രിയുടെ സന്ദര്‍ശനത്തിന്റെ ഭാഗമായി കനത്ത സുരക്ഷ ഏര്‍പെടുത്തി. 15 ഡി.വൈ.എസ്.പിമാരുടെ നേതൃത്വത്തില്‍ 900 പൊലിസുകാരെ വിന്യസിച്ചു. 40 സി.ഐമാരും സുരക്ഷക്ക് നേതൃത്വം നല്‍കും. സി.പി.എം സംസ്ഥാന സെക്രട്ടറി എം.വി ഗോവിന്ദന്റെ നേതൃത്വത്തിലുള്ള ജനകീയ പ്രതിരോധ യാത്ര ഉദ്ഘാടനം ചെയ്യുന്നതിനാണ് മുഖ്യമന്ത്രി ഇന്ന് കാസര്‍കോട് എത്തുന്നത്.

സന്ദര്‍ശനത്തിനിടെ പാലക്കാട്ടും കോഴിക്കോടും മുഖ്യമന്ത്രി പിണറായി വിജയന് നേരെ കരിങ്കൊടി ഉയര്‍ത്തിയിരുന്നു. വഴിനീളെ ശക്തമായ പൊലിസ് വിന്യാസമുണ്ടായിട്ടും ഇതിനെയെല്ലാം മറികടന്നായിരുന്നു കോണ്‍ഗ്രസ് പ്രവര്‍ത്തകരുടെ പ്രതിഷേധം. കോഴിക്കോട് കഴിഞ്ഞ ദിവസം കരിങ്കൊടി കാട്ടിയ നാല് യൂത്ത് കോണ്‍ഗ്രസ് പ്രവര്‍ത്തകരെ പൊലിസ് കസ്റ്റഡിയിലെടുത്തിരുന്നു. പ്രതിഷേധത്തിനിടെയുണ്ടായ മല്‍പ്പിടിത്തത്തിനിടയില്‍ നടക്കാവ് എസ്.ഐ പവിത്രന് പരുക്കേറ്റു.

രണ്ട് കെ.എസ്.യു പ്രവര്‍ത്തകരെയും യുവമോര്‍ച്ച പ്രവര്‍ത്തകരെയും കസ്റ്റഡിയിലെടുത്തിട്ടുണ്ട്. കോഴിക്കോട് വെസ്റ്റ് ഹില്ലില്‍ നിന്നാണ് രണ്ട് കെ.എസ്.യു പ്രവര്‍ത്തകരെ കസ്റ്റഡിയിലെടുത്തത്. പ്രതിപക്ഷ സംഘടനകളുടെ കടുത്ത പ്രതിഷേധങ്ങളെത്തുടര്‍ന്ന് കനത്ത സുരക്ഷയിലാണ് മുഖ്യമന്ത്രി കോഴിക്കോട്ട് പരിപാടിക്കെത്തിയത്. കാട്ടിലപ്പീടിക, എരഞ്ഞിപ്പാലം, ഈസ്റ്റ് ഹില്‍ എന്നിവിടങ്ങളില്‍ വച്ചാണ് കെ.എസ്.യു പ്രവര്‍ത്തകര്‍ കരിങ്കൊടി കാട്ടിയത്.

അതിനിടെ മീഞ്ചന്ത കോളജില്‍ കറുത്ത വസ്ത്രവും മാസ്‌ക്കും ധരിക്കുന്നതിന് വിലക്കേര്‍പ്പെടുത്തിയിരുന്നു. കറുപ്പ് ധരിക്കരുതെന്ന് കോളജ് അധികൃതര്‍ വിദ്യാര്‍ത്ഥികള്‍ക്ക് നിര്‍ദ്ദേശം നല്‍കുകയായിരുന്നു.

140 നിയമസഭാ മണ്ഡലങ്ങളിലൂടെയും കടന്നുപോകുന്ന ജാഥ മാര്‍ച്ച് 18നു തിരുവനന്തപുരത്തു സമാപിക്കും. സംസ്ഥാന സെക്രട്ടറി എന്ന നിലയില്‍ എം.വി ഗോവിന്ദന്‍ നയിക്കുന്ന ആദ്യത്തെ പ്രചാരണ യാത്രയാണ് ജനകീയ പ്രതിരോധ ജാഥ. കേന്ദ്ര സര്‍ക്കാരിനെതിരെയുള്ള രാഷ്ട്രീയ പ്രചാരണമാണ് ലക്ഷ്യം. ലോക്‌സഭാ തെരഞ്ഞെടുപ്പിന് പാര്‍ട്ടിയെ സജ്ജമാക്കാന്‍ നടത്തിയ ഗൃഹസന്ദര്‍ശന പരിപാടിക്കു ശേഷമാണ് സി.പി.എം ജാഥയ്ക്ക് ഒരുങ്ങുന്നത്. ഇന്ധന സെസ് വര്‍ധനവ് ഉള്‍പ്പെടെ സര്‍ക്കാരിനെതിരെയുള്ള വിമര്‍ശനങ്ങള്‍ക്കുള്ള മറുപടിയും യാത്രയിലൂടെ പാര്‍ട്ടി ലക്ഷ്യമിടുന്നു.

സി.എസ് സുജാത, പി.കെ ബിജു, എം.സ്വരാജ്, കെ.ടി ജലീല്‍, ജെയ്ക് സി.തോമസ് എന്നിവരാണു ജാഥയിലെ സ്ഥിരാംഗങ്ങള്‍. മഞ്ചേശ്വരം മണ്ഡലത്തിലെ കുമ്പളയില്‍ നാളെ വൈകിട്ട് നാലിനു ഗോവിന്ദനു പതാക കൈമാറി മുഖ്യമന്ത്രി പിണറായി വിജയന്‍ ജാഥ ഉദ്ഘാടനം ചെയ്യും. മണ്ഡലങ്ങളിലെ സ്വീകരണങ്ങള്‍ കൂടാതെ പൗരപ്രമുഖരുമായി എം.വി.ഗോവിന്ദന്‍ നടത്തുന്ന പ്രത്യേക ചര്‍ച്ചകളും യാത്രയുടെ ഭാഗമായി നടക്കും.

അതേസമയം,ക്വട്ടേഷന്‍ ഗുണ്ടാ മാഫിയാ സംഘങ്ങള്‍ക്കെതിരെ തില്ലങ്കേരിയില്‍ സി.പി.എം വിശദീകരണ യോഗം ഇന്ന് ചേരും.യോഗത്തില്‍ പി. ജയരാജന്‍ പങ്കെടുക്കും.