തേഞ്ഞിപ്പലം: കാലിക്കറ്റ് സര്‍വകലാശാലയിലെ അവശ്യസര്‍വിസുകളൊഴികെ മുഴുവന്‍ ഓഫിസുകളും മെയ് ഒന്‍പതു വരെ അടച്ചിടാന്‍ വൈസ് ചാന്‍സലറുടെ അധ്യക്ഷതയില്‍ ചേര്‍ന്ന വിവിധ വകുപ്പ് തലവന്‍മാരുടെ യോഗത്തില്‍ തീരുമാനിച്ചു. സര്‍വകലാശാല കെട്ടിടങ്ങള്‍ സ്ഥിതി ചെയ്യുന്ന തേഞ്ഞിപ്പലം, ചേലേമ്പ്ര, പള്ളിക്കല്‍ ഗ്രാമ പഞ്ചായത്തുകളില്‍ കൊവിഡ് വ്യാപനം രൂക്ഷമായതിനാല്‍ 144 പ്രഖ്യാപിച്ചിരിക്കുകയാണ്. വാഴ്‌സിറ്റി ഹോസ്റ്റലിലെ പത്തു വിദ്യാര്‍ഥികള്‍ക്കും പരീക്ഷാഭവന്‍ ഉള്‍പ്പെടെ വിവിധ ഓഫിസുകളിലെ ജീവനക്കാരില്‍ ചിലര്‍ക്കും കൊവിഡ് ബാധിച്ചിരുന്നു. വീടുകളിലിരുന്നുള്ള ജീവനക്കാരുടെ ജോലി കാര്യങ്ങള്‍ പരിശോധിക്കാന്‍ മേധാവികളെ ചുമതലപ്പെടുത്തിയിട്ടുണ്ട്.