കോഴിക്കോട്:പ്രസവ ശസ്ത്രക്രിയയ്ക്കിടെ വയറ്റില്‍ കത്രിക കുടുങ്ങിയ സംഭവത്തില്‍ നീതി ലഭിക്കണമെന്നാവശ്യപ്പെട്ട് കോഴിക്കോട് മെഡിക്കല്‍ കോളജിന് മുന്നില്‍ നടത്തിയ സമരം പിന്‍വലിച്ച് ഹര്‍ഷിന. ആരോഗ്യമന്ത്രി വീണ ജോര്‍ജുമായി നടത്തിയ ചര്‍ച്ചയ്ക്ക് ശേഷമാണ് തീരുമാനം. നീതി ലഭ്യമാക്കുമെന്ന് ആരോഗ്യമന്ത്രി ഉറപ്പ് നല്‍കി. കൂടാതെ രണ്ടാഴ്ചയ്ക്കകം നഷ്ടപരിഹാരം നല്‍കുമെന്ന് മന്ത്രി പറഞ്ഞതായി ഹര്‍ഷിന കൂട്ടിചേര്‍ത്തു.

കോഴിക്കോട് മെഡിക്കല്‍ കോളജ് പ്രിന്‍സിപ്പലിന്റെ ഓഫിസില്‍ വച്ചായിരുന്നു ചര്‍ച്ച. മന്ത്രി വീണാ ജോര്‍ജ് സമരപ്പന്തലില്‍ എത്തി ഹര്‍ഷിനയെ കണ്ടശേഷം ചര്‍ച്ചയ്ക്ക് ക്ഷണിക്കുകയായിരുന്നു. ഹര്‍ഷിനയ്‌ക്കൊപ്പം ഭര്‍ത്താവും ചര്‍ച്ചയില്‍ പങ്കെടുത്തു.

ഹര്‍ഷിനയുടെ വയറ്റില്‍നിന്ന് കണ്ടെത്തിയ ശസ്ത്രക്രിയയ്ക്ക് ഉപയോഗിക്കുന്ന കത്രിക കോഴിക്കോട് മെഡിക്കല്‍ കോളജിന്റെയല്ലെന്നാണ് ആരോഗ്യവകുപ്പിന്റെ അന്വേഷണ റിപ്പോര്‍ട്ടില്‍ പറയുന്നത്. 2017ല്‍ കോഴിക്കോട് മെഡിക്കല്‍ കോളജില്‍ നടത്തിയ ശസ്ത്രക്രിയയ്ക്കുശേഷമാണ് അസഹനീയമായ വേദനയും മറ്റും അനുഭവപ്പെട്ടതെന്ന് ഹര്‍ഷിന ചൂണ്ടിക്കാട്ടിയിരുന്നു. പക്ഷേ എങ്ങനെയാണ് 6 ഇഞ്ച് നീളമുള്ള കത്രിക ഹര്‍ഷിനയുടെ വയറ്റില്‍ കുടുങ്ങിയതെന്ന് റിപ്പോര്‍ട്ടില്‍ പറയുന്നില്ല. റിപ്പോര്‍ട്ടിലെ വൈരുദ്ധ്യവും ആരോഗ്യവകുപ്പില്‍ നിന്ന് നീതി ലഭിക്കുന്നില്ലെന്നും ചൂണ്ടിക്കാട്ടിയാണ് ഹര്‍ഷിന സമരം ആരംഭിച്ചത്.