സ്വന്തം ലേഖകൻ
കൊച്ചി
എ.ഡി.ജി.പി ശ്രീജിത്തിനെ ക്രൈംബ്രാഞ്ച് മേധാവി സ്ഥാനത്തുനിന്ന് നീക്കിയതോടെ നടിയെ ആക്രമിച്ച കേസ് അനിശ്ചിതത്വത്തിൽ. കേസിന്റെ നിർണായകഘട്ടത്തിലുള്ള ഈ മാറ്റം അന്വേഷണത്തെ കാര്യമായി ബാധിക്കുമെന്ന് ഉറപ്പാണ്. തുടരന്വേഷണത്തിന്റെ ഭാഗമായി അഭിഭാഷകരുടേതുൾപ്പെടെ നിർണായക ശബ്ദരേഖകളും മറ്റും പുറത്തുവന്ന സാഹചര്യത്തിൽ ആത്മവിശ്വാസത്തിൽ മുന്നോട്ടുപോവുകയായിരുന്നു അന്വേഷണസംഘം.
എന്നാൽ, അന്വേഷണ സംഘത്തിൻ്റെ ചുമതലയുള്ള ക്രൈംബ്രാഞ്ച് മേധാവിയുടെ മാറ്റം തുടർന്നുള്ള ചോദ്യം ചെയ്യലുകളും മറ്റും നീണ്ടുപോകാനിടയാക്കും. തുടരന്വേഷണ റിപ്പോർട്ട് കോടതിയിൽ സമർപ്പിക്കാൻ ഇനി 36 ദിവസം മാത്രമാണ് ബാക്കിയുള്ളത്. ഇതിനിടെ നടി കാവ്യാ മാധവനെയും അഭിഭാഷകരെയും ചോദ്യംചെയ്യേണ്ടതുണ്ട്.
പുതിയ മേധാവിയെത്തി കേസ് പഠിച്ചശേഷം മാത്രമേ അന്വേഷണം പൂർണഗതിയിൽ മുന്നോട്ടു കൊണ്ടുപോകാനാവൂ. മാത്രമല്ല, ക്രൈംബ്രാഞ്ച് മേധാവിയുടെ സാന്നിധ്യത്തിലാണ് കാവ്യാ മാധവനെയും അഭിഭാഷകരെയും ചോദ്യംചെയ്യേണ്ടത്. നിലവിലെ സാഹചര്യത്തിൽ ചോദ്യം ചെയ്യലുകൾ നീണ്ടുപോയാൽ അന്വേഷണ റിപ്പോർട്ട് യഥാസമയം സമർപ്പിക്കാൻ അന്വേഷണസംഘം ഏറെ പ്രയാസപ്പെടേണ്ടിവരും. രണ്ടുതവണ കോടതി സമയം നീട്ടിനൽകിയ സാഹചര്യത്തിൽ ഇനിയും സമയം ആവശ്യപ്പെട്ടാൽ കോടതിയുടെ വിമർശനത്തിനിടയായേക്കും.
ദിലീപിൻ്റെ അഭിഭാഷകൻ അഡ്വ. രാമൻ പിള്ളയുടെ ശബ്ദരേഖ പുറത്തുവന്ന സാഹചര്യത്തിലാണ് ക്രൈംബ്രാഞ്ച് മേധാവിക്ക് സ്ഥാനചലന മുണ്ടായതെന്നും സൂചനയുണ്ട്. ശബ്ദരേഖ പുറത്തുവന്നത് സംബന്ധിച്ച് അഡ്വ. രാമൻ പിള്ള ആഭ്യന്തര സെക്രട്ടറിക്ക് പരാതി നൽകിയിരുന്നു.
അഭിഭാഷക സംഘടനയും ഇതിനെതിരേ രംഗത്തെത്തിയിരുന്നു.