തിരുവനന്തപുരം: അവനവന്റെ ഉത്തരവാദിത്തം നിറവേറ്റാന്‍ ആര്‍ജവമില്ലാതിരിക്കുന്നതാണ് പരാജയമെന്ന് സ്പീക്കര്‍ തിരിച്ചറിയണമെന്ന് ഷാഫി പറമ്പില്‍ എം.എല്‍.എ. പിണറായി വിജയന്റെ കണ്ണുരുട്ടല്‍ ഭയന്ന് പദവിയുടെ ഉത്തരവാദിത്തം മറക്കുകയാണ് സ്പീക്കറെന്നും അദ്ദേഹം പറഞ്ഞു. ഷാഫി പറമ്പില്‍ അടുത്ത തെരഞ്ഞെടുപ്പില്‍ തോല്‍ക്കുമെന്ന സ്പീക്കര്‍ എ.എന്‍ ഷംസീറിന്റെ പരാമര്‍ശത്തോട് പ്രതികരിക്കുകയായിരുന്നു അദ്ദേഹം.

ന്യായമായ ആവശ്യം സഭയില്‍ ഉന്നയിച്ചതിനാണ് ഇത് പറഞ്ഞത്. ശിവന്‍കുട്ടി സഭയ്ക്കകത്ത് കാണിച്ചത് ഞങ്ങളാരും ചെയ്തിട്ടില്ല. ഞങ്ങള്‍ കസേരയും കമ്പ്യൂട്ടറും തല്ലി പൊളിച്ചിട്ടില്ല. ഞങ്ങള്‍ പ്രതിഷേധിച്ചിട്ടുണ്ട്. പറയാനുള്ള കാര്യങ്ങള്‍ വ്യക്തമായി പറഞ്ഞിട്ടുണ്ട്. മുഖ്യമന്ത്രിയുടെ കണ്ണുരുട്ടല്‍ ഭയന്ന് പദവിയുടെ ഉത്തരവാദിത്തങ്ങള്‍ മറന്ന സ്പീക്കര്‍ പരാജയമാണോ എന്നത് അദ്ദേഹം ആത്മപരിശോധന നടത്തണമെന്നും ഷാഫി പറഞ്ഞു.

അടുത്ത തെരഞ്ഞെടുപ്പില്‍ തോല്‍ക്കുമെന്ന സ്പീക്കറുടെ പരാമര്‍ശനത്തിന് അത് പാലക്കാട്ടുകാരും എന്റെ പാര്‍ട്ടിയും തീരുമാനിക്കുമെന്ന് അദ്ദേഹം ഫേസ്ബുക്കിലും കുറിച്ചു.

ബ്രഹ്മപുരം മാലിന്യ വിഷയത്തില്‍ പ്രതിഷേധിച്ച പ്രതിപക്ഷ അംഗങ്ങളെയാണ് സ്പീക്കര്‍ എ.എന്‍ ഷംസീര്‍ പരിഹസിച്ചത്. പ്രതിപക്ഷ അംഗങ്ങള്‍ പലരും നേരിയ ഭൂരിപക്ഷത്തില്‍ ജയിച്ചവരാണെന്ന് പറഞ്ഞ സ്പീക്കര്‍ ഇതെല്ലാം ജനങ്ങള്‍ കാണുന്നുണ്ടെന്നും ഷാഫി പറമ്പില്‍ അടുത്ത തവണ തെരഞ്ഞടുപ്പില്‍ തോല്‍ക്കുമെന്നും പറഞ്ഞു.

ഷാഫി പറമ്പിലിനെ മാത്രമല്ല, റോജി എം ജോണിനെയും ചാലക്കുടി എം.എല്‍.എ സനീഷ് ജോസഫിനെയും സ്പീക്കര്‍ ഉപദേശിച്ചു. വളരെ കുറഞ്ഞ ഭൂരിപക്ഷത്തില്‍ ജയിച്ചവരാണെന്നും ജനങ്ങള്‍ ഇതെല്ലാം കാണുന്നുണ്ടെന്നും സ്പീക്കര്‍ പറഞ്ഞു. പതിനാറാം നിയമസഭയിലേക്ക് വരേണ്ടതല്ലേയെന്നും ചോദിച്ചു.