തിരുവനന്തപുരം: കൊവിഡ് രണ്ടാംതരംഗം രൂക്ഷമായ സാഹചര്യത്തില്‍ ഈ വര്‍ഷത്തെ എസ്.എസ്.എല്‍.സി, പ്ലസ്ടു പരീക്ഷാഫലങ്ങള്‍ വൈകും. ലോക്ക്ഡൗണ്‍ നിയന്ത്രണങ്ങളെ തുടര്‍ന്ന് മൂല്യനിര്‍ണയ ക്യാംപുകള്‍ ഇതുവരെ ആരംഭിക്കാനാവാത്തതാണ് കാരണം. 

 

മെയ് അഞ്ചു മുതല്‍ പ്ലസ്ടുവിന്റെയും 10 മുതല്‍ എസ്.എസ്.എല്‍.സിയുടെയും മൂല്യനിര്‍ണയം നടത്താനായിരുന്നു തീരുമാനിച്ചിരുന്നത്. കൊവിഡ് വ്യാപനം രൂക്ഷമായതോടെ ഇതുരണ്ടും മാറ്റി. 

ജൂണ്‍ പകുതിയോടെ ഫലം പ്രഖ്യാപിക്കുമെന്നായിരുന്നു വിദ്യാഭ്യാസ വകുപ്പ് അറിയിച്ചിരുന്നത്. എന്നാല്‍, നിലവിലെ സാഹചര്യത്തില്‍ കുറഞ്ഞ സമയത്തിനുള്ളില്‍ മൂല്യനിര്‍ണയം പൂര്‍ത്തിയാക്കി ഫലപ്രഖ്യാപനം സാധ്യമാകില്ല. കൊവിഡ് വ്യാപനം കുറയാതെ ക്യാംപുകള്‍ ആരംഭിക്കരുതെന്നാണ് അധ്യാപകരുടെയും അഭിപ്രായം. 

 

ഉത്തരക്കടലാസുകള്‍ വീടുകളിലെത്തിച്ച് മൂല്യനിര്‍ണയം നടത്തുന്നതിനെപ്പറ്റി ആലോചിക്കണമെന്ന് ചില അധ്യാപക സംഘടനകള്‍ ആവശ്യപ്പെട്ടിരുന്നു. എന്നാല്‍, വീടുകളിലെ മൂല്യനിര്‍ണയം വിവാദങ്ങള്‍ക്ക് വഴിവച്ചേക്കുമെന്ന് ആക്ഷേപമുണ്ട്. നിലവില്‍ കേന്ദ്രീകൃത മൂല്യനിര്‍ണയം സാധിക്കില്ലെന്ന് പൊതുവിദ്യാഭ്യാസ സെക്രട്ടറി എ.പി.എം മുഹമ്മദ് ഹനീഷ് പറഞ്ഞു. കൊവിഡ് സാഹചര്യം പരിഗണിച്ചായിരിക്കും ഇക്കാര്യത്തില്‍ അന്തിമ തീരുമാനം. 

 

രഹസ്യ സ്വഭാവം ചോരാതെ മൂല്യനിര്‍ണയം നടത്താന്‍ പകരം മാര്‍ഗങ്ങള്‍ തേടുകയാണെന്നും അദ്ദേഹം പറഞ്ഞു.

 

 

തിരുവനന്തപുരം: സംസ്ഥാനത്ത് ഒന്‍പതാം ക്ലാസ് വരെയുള്ള വിദ്യാര്‍ഥികളുടെ സ്ഥാനക്കയറ്റത്തിന് പുതിയ മാനദണ്ഡം ഏര്‍പ്പെടുത്താന്‍ തീരുമാനം.

ഇതുസംബന്ധിച്ച മാര്‍ഗരേഖ ഉടന്‍ പുറത്തിറക്കുമെന്ന് പൊതുവിദ്യാഭ്യാസ വകുപ്പ് അറിയിച്ചു. വിദ്യാര്‍ഥികളുടെ ക്ലാസ് കയറ്റത്തിനായി ഉദ്ദേശിച്ചിരുന്ന വീട്ടുപരീക്ഷ കൊവിഡ് രണ്ടാംതരംഗത്തെ തുടര്‍ന്ന് മാറ്റിയ സാഹചര്യത്തിലാണ് പുതിയ സംവിധാനം ഒരുക്കുന്നത്.

 

കുട്ടികള്‍ക്കും അധ്യാപകര്‍ക്കും പ്രയാസം ഇല്ലാത്ത രീതിയില്‍ സ്ഥാനക്കയറ്റ സംവിധാനം ഒരുക്കാനാണ് തീരുമാനം. കൊവിഡ് പശ്ചാത്തലത്തില്‍ ഒന്നു മുതല്‍ ഒന്‍പതുവരെയുള്ള ക്ലാസുകളിലെ വാര്‍ഷിക പരീക്ഷകള്‍ ഒഴിവാക്കിയ സാഹചര്യത്തിലാണ് പഠനനിലവാരം അളക്കാന്‍ വീട്ടുപരീക്ഷ ഏര്‍പ്പെടുത്താന്‍ തീരുമാനിച്ചത്. എന്നാല്‍ കൊവിഡ് രണ്ടാംതരംഗത്തെ തുടര്‍ന്ന് ഇതിന് പുസ്തകരൂപത്തിലുള്ള പഠനമികവ് രേഖ വീടുകളില്‍ എത്തിക്കാന്‍ കഴിയാത്ത സാഹചര്യത്തിലാണ് സ്ഥാനക്കയറ്റത്തിനായി വിദ്യാഭ്യാസ വകുപ്പ് പുതിയ മാനദണ്ഡം തയാറാക്കിയത്.