ബാസിത് ഹസൻ
തൊടുപുഴ
സംസ്ഥാനത്തെ വൈദ്യുതി നിലയങ്ങൾ കാണാൻ പൊതുജനങ്ങൾക്കും വിദ്യാർഥികൾക്കും അവസരം. കർശന ഉപാധികളോടെയാണ് സംരക്ഷണ മേഖലയിലെ പവർ ഹൗസുകൾ കെ.എസ്.ഇ.ബി തുറന്നുകൊടുക്കുക. മുതിർന്നവർക്ക് 250 രൂപയും വിദ്യാർഥികൾക്ക് 50 രൂപയും ഫീസ് ഈടാക്കിയാണ് പ്രവേശനം അനുവദിക്കുക.
പ്രവേശനം കേരളത്തിലെ വിദ്യാഭ്യാസ സ്ഥാപനങ്ങളിലെ വിദ്യാർഥികൾക്ക് മാത്രമായിരിക്കും. 10 വയസിൽ താഴെയുള്ള കുട്ടികൾക്ക് പ്രവേശനമില്ല. അതേസമയം കേന്ദ്ര ഇന്റലിജൻസ് ബ്യൂറോയുടെ കർശന നിർദേശം നിലനിൽക്കുന്നതിനാൽ ഇടുക്കി, ശബരിഗിരി പവർ ഹൗസുകളിൽ പ്രവേശന വിലക്ക് തുടരും. ഡാമുമായി ചേർന്നുനിൽക്കുന്നതിനാൽ മലമ്പുഴ ചെറുകിട വൈദ്യുത പദ്ധതിയിലും പ്രവേശനം അനുവദിക്കില്ല.
സന്ദർശകർക്ക് മാർഗനിർദേശം നൽകാൻ കെ.എസ്.ഇ.ബി ഒരു ഉദ്യോഗസ്ഥനെ പ്രത്യേകമായി ചുമതലപ്പെടുത്തും. ഒരേസമയം 10 പേർക്കും ഒരു ദിവസം പരമാവധി 50 പേർക്കും മാത്രമാണ് പ്രവേശനം അനുവദിക്കുക. പൊതുഅവധി ഒഴികെയുള്ള ദിനങ്ങളിൽ രാവിലെ 10 മുതൽ അഞ്ചുവരെ പവർഹൗസുകളിൽ പ്രവേശിക്കാം. വൈദ്യുതി ബോർഡ് ജീവനക്കാർക്കും വിരമിച്ച ജീവനക്കാർക്കും ഫീസില്ല. പവർ ഹൗസിലേക്കുള്ള പ്രവേശന അപേക്ഷ ഓൺലൈനിലൂടെ മാത്രമായിരിക്കും. സന്ദർശിക്കാൻ താൽപര്യപ്പെടുന്ന ദിവസത്തിന് രണ്ടുദിവസം മുമ്പെങ്കിലും അതാത് ജനറേഷൻ സർക്കിളുകളിലെ ഡെപ്യൂട്ടി ചീഫ് എൻജിനീയർക്ക് അപേക്ഷ സമർപ്പിക്കണം. 16 വലിയ പവർ ഹൗസുകളും 20 ഓളം ചെറുകിട പവർ ഹൗസുകളുമാണ് വൈദ്യുതി ബോർഡിന് കീഴിലുള്ളത്.
1984 ൽ ഇന്ദിരാഗാന്ധിയുടെ വധത്തേത്തുടർന്നാണ് സംസ്ഥാനത്തെ ഏറ്റവും വലിയ ജലവൈദ്യുതോൽപ്പാദന കേന്ദ്രമായ ഇടുക്കി ഭൂഗർഭ പവർ ഹൗസിൽ സന്ദർശകർക്ക് വിലക്കേർപ്പെടുത്തിയത്. തുടർന്ന് ഇപ്പോഴും ഐ.ബി നിർദേശപ്രകാരം വിലക്ക് തുടരുകയാണ്. രണ്ടാമത്തെ വലിയ നിലയമായ ശബരിഗിരിയിലേയും സ്ഥിതി ഇതുതന്നെയാണ്.