വാഷിങ്ടണ്‍: അമേരിക്കയിലെ ആദ്യത്തെ ഹിജാബ് ധരിച്ച ജഡ്ജിയായി അധികാരമേറ്റ് നാദിയ കഹ്ഫ്. വെയ്‌നില്‍ നിന്നുള്ള കുടുംബനിയമ കുടിയേറ്റ അറ്റോണിയായ നാദിയ സ്ഥാനമേറ്റത്. വ്യാഴാഴ്ച ഖുര്‍ആനില്‍ തൊട്ടാണ് നാദിയ സത്യപ്രതിജ്ഞ ചെയ്ത് അധികാരമേറ്റത്.

ഒരു വര്‍ഷം മുന്‍പ് ന്യൂജഴ്‌സി ഗവര്‍ണര്‍ ഫിര്‍ മര്‍ഫിയാണ് അവരെ സുപീരിയര്‍ കോര്‍ട്ട് ജഡ്ജിയായി നാമനിര്‍ദേശം ചെയ്തത്. ന്യൂജഴ്‌സിയിലെ പസായിക് കൗണ്ടിയിലാണ് നാദിയയുടെ നിയമനം. ഇതിന് മുന്‍പും യു.എസില്‍ മുസ്‌ലിം വനിതകള്‍ സ്റ്റേറ്റ് ജഡ്ജിയായിട്ടുണ്ടെങ്കിലും ആദ്യമായാണ് ന്യൂജഴ്‌സിയില്‍ ഹിജാബ് ധരിച്ചൊരാള്‍ ഈ സ്ഥാനത്തെത്തുന്നത്.

ന്യൂജഴ്‌സിയിലെ അറബ് മുസ്‌ലിം സമൂഹത്തെ പ്രതിനിധീകരിക്കുന്നതില്‍ അഭിമാനവും സന്തോഷവുമുണ്ടെന്ന് സത്യപ്രതിജ്ഞാ ചടങ്ങില്‍ വച്ച് നാദിയ പറഞ്ഞു. വര്‍ഷങ്ങളായി യു.എസിലെ സാമൂഹികരംഗത്ത് സജീവമായ നാദിയ 2003 മുതല്‍ മുസ്‌ലിം പൗരാവകാശ സംഘടനയായ കൗണ്‍സില്‍ ഓണ്‍ അമേരിക്കന്‍ഇസ്‌ലാമിക് റിലേഷന്‍സിന്റെ ന്യൂജഴ്‌സി ചാപ്റ്റര്‍ ബോര്‍ഡ് അംഗമായിരുന്നു.

നിലവില്‍ സംഘടനയുടെ ചെയര്‍പേഴ്‌സനാണ്. നാദിയക്ക് രണ്ടു വയസുള്ളപ്പോഴാണ് കുടുംബം സിറിയയില്‍നിന്ന് അമേരിക്കയിലേക്ക് കുടിയേറിയത്.