ശാമില്‍ ചുള്ളിപ്പാറ

പഴയ
ബദാം മരച്ചുവട്ടിലെ
ഗോപി മാഷിന്റെ
ക്ലാസാരോ സ്ഫടിക കഷ്ണത്തിലേക്ക്
പറിച്ചു നട്ടു.

തൊണ്ണൂറ് തികഞ്ഞ
നാരായണേട്ടനും
ടച്ച് സ്‌ക്രീനിലമര്‍ന്നു
ലോകം കാണാന്‍ തുടങ്ങി.

വാകമരത്തിന് ചുവടെ
പൂക്കാറുള്ള
ഞങ്ങളുടെ പ്രണയസല്ലാപങ്ങള്‍
വാട്ട്‌സാപ്പിലേക്ക്
കൂടുമാറി.

അധരങ്ങളില്‍
സ്‌നേഹ ചുംബനങ്ങള്‍
നല്‍കാറുള്ള ഞങ്ങള്‍
'ലൗ'സിംബലുകളിട്ട്
സ്‌നേഹം പങ്കിട്ടു.

ടൗണിലെ
ഫൈവ്സ്റ്റാര്‍ ഹോട്ടലിലെ
ശൗചാലയത്തില്‍
കയറാന്‍ പി.ജി സര്‍ട്ടിഫിക്കറ്റ് ചോദിച്ചുതുടങ്ങി.

ഓണ്‍ലൈനിന്റെ
ഉറച്ച ഗന്ധത്തിലെത്തിയ
കാറ്റിനോട് ഞാന്‍
ചോദിച്ചു: ഏതാണീ ലോകം?
ചിരിച്ചുകൊണ്ട്
കാറ്റ് മറുപടി തന്നു:
ഇതാണ് ഇ-ലോകം.