തിരുവനന്തപുരം: ഭക്ഷ്യസുരക്ഷാ പദ്ധതി നടപ്പാക്കുന്നതിന്റെ ഭാഗമായുള്ള കംപ്യൂട്ടര്‍വല്‍കരണം പൂര്‍ത്തിയാക്കാന്‍ സംസ്ഥാന സര്‍ക്കാരിന് കേന്ദ്രത്തിന്റെ അന്ത്യശാസനം.
മൂന്നുമാസത്തിനുള്ളില്‍ കംപ്യൂട്ടര്‍വല്‍കരണ പരിപാടികള്‍ പൂര്‍ത്തീകരിക്കാനാണ് നിര്‍ദേശം. അല്ലാത്തപക്ഷം സംസ്ഥാനത്തിന്റെ അധികധാന്യവിഹിതം വെട്ടിക്കുറയ്ക്കുമെന്നും മുന്നറിയിപ്പ് നല്‍കിയിട്ടുണ്ട്. ഭക്ഷ്യസുരക്ഷ ഉറപ്പാക്കാനും പൊതുവിതരണ സമ്പ്രദായം ശക്തിപ്പെടുത്താനും അടിസ്ഥാനതലങ്ങളില്‍ കംപ്യൂട്ടര്‍വല്‍കരണം ഉറപ്പാക്കണമെന്ന് കേന്ദ്രം നിരവധിതവണ നിര്‍ദേശം നല്‍കിയിരുന്നതാണ്. കേരളവും തമിഴ്‌നാടും നാഗാലാന്‍ഡും മാത്രമാണ് പൊതുവിതരണ സമ്പ്രദായത്തില്‍ താഴേത്തട്ടില്‍ കംപ്യൂട്ടര്‍വല്‍കരണം പൂര്‍ത്തിയാക്കാത്തത്.
 റേഷന്‍ മൊത്തവ്യാപാരികള്‍ ഉള്‍പ്പെട്ട ലോബി കംപ്യൂട്ടര്‍വല്‍കരണം പരാജയപ്പെടുത്താനുള്ള നീക്കങ്ങള്‍ നടത്തുന്നുവെന്ന വാര്‍ത്തകള്‍ പുറത്തുവരുന്നതിനിടെയാണ് കേന്ദ്രം നിലപാട് കര്‍ശനമാക്കിയത്. കംപ്യൂട്ടര്‍വല്‍കരണത്തിലൂടെ റേഷന്‍കടകള്‍ കാര്യക്ഷമമായാല്‍ രേഖകളില്‍ തിരിമറി നടത്തി ഭക്ഷ്യധാന്യങ്ങള്‍ കരിഞ്ചന്തയില്‍ വില്‍ക്കാനുള്ള സാധ്യതകള്‍ ഇല്ലാതാകും. എല്ലാവര്‍ക്കും ഭക്ഷണം എന്ന ലക്ഷ്യത്തോടെ രൂപകല്‍പ്പന ചെയ്ത ഭക്ഷ്യസുരക്ഷാനിയമത്തില്‍ കംപ്യൂട്ടര്‍വല്‍കരണം പ്രധാനപ്പെട്ടതാണ്.
എന്നാല്‍, സംസ്ഥാനത്ത് ഇതുവരെ 21 റേഷന്‍ കടകളില്‍ മാത്രമാണ് പരീക്ഷണാടിസ്ഥാനത്തില്‍ കംപ്യൂട്ടര്‍വല്‍കരണം നടപ്പാക്കിയിട്ടുള്ളത്.