തിരുവനന്തപുരം: ഓപ്പറേഷന്‍ അനന്തയുടെ പ്രവൃത്തികള്‍ വിലയിരുത്തുന്നതിന് രൂപീകരിച്ച ഉന്നതാധികാര സമിതി ഉടന്‍ റിപ്പോര്‍ട്ട് സമര്‍പ്പിക്കണമെന്ന് ജില്ലാ കലക്ടര്‍ എസ്. വെങ്കിടേസപതി. കലക്ടറേറ്റ് കോണ്‍ഫറന്‍സ് ഹാളില്‍ വിളിച്ചുചേര്‍ത്ത  ഉദ്യോഗസ്ഥതല യോഗത്തിലാണ് കലക്ടറുടെ നിര്‍ദേശം. ഓപ്പറേഷന്‍ അനന്ത ഒന്നാംഘട്ടത്തിന്റെ പൂര്‍ണതോതിലുള്ള പ്രവര്‍ത്തന അവലോകനവും ആവശ്യമാണെന്ന് കലക്ടര്‍ വ്യക്തമാക്കി.
രണ്ടാംഘട്ട പ്രവര്‍ത്തനങ്ങള്‍  ആരംഭിക്കേണ്ട പശ്ചാത്തലത്തില്‍ ഉന്നതാധികാര സമിതി യോഗം ഈ മാസം 23-ന് രാവിലെ പത്തിന് കേരളാ റോഡ് ഫണ്ട് ബോര്‍ഡ് ഓഫിസില്‍ ചേരാന്‍ യോഗം തീരുമാനിച്ചു. ഉന്നതാധികാര സമിതി യോഗത്തിന്റെ ശിപാര്‍ശകള്‍ കലക്ടര്‍ക്ക് സമര്‍പ്പിക്കണം. ഇത് വിലയിരുത്തിയ ശേഷം ചീഫ് സെക്രട്ടറിക്ക് സമര്‍പ്പിക്കുമെന്ന് കലക്ടര്‍ പറഞ്ഞു. കേരളാ റോഡ് ഫണ്ട് ബോര്‍ഡാണ് 'ഓപ്പറേഷന്‍ അനന്ത'യുടെ നോഡല്‍ ഏജന്‍സി. 25 ലക്ഷം രൂപ വരെയുള്ള പ്രവൃത്തികളുടെ അനുമതി ജില്ലാ കലക്ടര്‍ക്ക് നല്‍കാനാകും. അതിനുമുകളിലുള്ളവക്ക് അനുമതി നല്‍കേണ്ടത് സംസ്ഥാന ദുരന്തനിവാരണ അതോറിറ്റിയാണ്.
ജില്ലാ പ്ലാനിങ് ഓഫിസര്‍ ബിജു വി.എസ്, കേരളാ റോഡ് ഫണ്ട് ബോര്‍ഡ് ചീഫ് കോഡിനേറ്ററും പ്രോജക്ട് എന്‍ജിനീയറുമായ സി.കെ രാജേന്ദ്രബാബു, പി.ഡബ്ല്യു.ഡി ഉള്‍പ്പെടെ പദ്ധതിയുമായി ബന്ധപ്പെട്ട വിവിധ ഉദ്യോഗസ്ഥര്‍ പങ്കെടുത്തു.