ചാമ്പ്യന്‍സ് ലീഗിലെ ആവേശകരമായ ആദ്യ പാദ ക്വാര്‍ട്ടര്‍ ഫൈനല്‍ മത്സരത്തില്‍ ബയേണിനെ തകര്‍ത്ത് മിന്നും വിജയം സ്വന്തമാക്കിയിരിക്കുകയാണ് മാഞ്ചസ്റ്റര്‍ സിറ്റി. മത്സരം 27 മിനിട്ട് പിന്നിട്ടപ്പോള്‍ റോഡ്രി നേടിയ ഗോളില്‍ മുന്നിലെത്തിയ സിറ്റി, കളിയുടെ രണ്ടാം പാദത്തില്‍ ബെര്‍ണാഡോ സില്‍വ, എര്‍ലിങ് ഹാലണ്ട് എന്നിവര്‍ നേടിയ ഗോളില്‍ ബയേണിനെ തകര്‍ത്തെറിയുകയായിരുന്നു.

എത്തിഹാദില്‍ വെച്ച് നടന്ന മത്സരത്തില്‍ വിജയിക്കാന്‍ കഴിഞ്ഞതോടെ ഇനി ബയേണിന്റെ മൈതാനത്ത് വെച്ച് നടക്കുന്ന മത്സരത്തില്‍ കൂടുതല്‍ കൃത്യതയോടെ തന്ത്രങ്ങള്‍ മെനയാന്‍ പെപ്പ് ഗ്വാര്‍ഡിയോളക്കും കൂട്ടര്‍ക്കുമാകും. ബയേണിനെതിരെ ഗോള്‍ നേടിയതോടെ തന്റെ ചാമ്പ്യന്‍സ് ലീഗിലെ ഗോള്‍ നേട്ടം 34ലേക്കെത്തിക്കാന്‍ ഹാലണ്ടിനായി.

എന്നാല്‍ ഹാലണ്ട് ഓരോ മത്സരങ്ങള്‍ കഴിയുമ്പോഴും സമ്പൂര്‍ണനായികൊണ്ടിരിക്കുകയാണെന്നും താരം കരിയറില്‍ ആയിരം ഗോള്‍ തികക്കുമെന്നും അഭിപ്രായപ്പെട്ട് രംഗത്തെത്തിയിരിക്കുകയാണ് മുന്‍ ചെല്‍സി താരമായ ജോ കോള്‍.

ബയേണ്‍ മ്യൂണിക്കിനെതിരായ സിറ്റിയുടെ മത്സരശേഷം ബി.ടി സ്‌പോര്‍ട്‌സിനോട് സംസാരിക്കവെയായിരുന്നു ഹാലണ്ടിനെക്കുറിച്ചുള്ള തന്റെ അഭിപ്രായങ്ങള്‍ ജോ കോള്‍ തുറന്ന് പറഞ്ഞത്.

'ഹാലണ്ട് ഓരോ മത്സരങ്ങള്‍ കഴിയുന്തോറും കൂടുതല്‍ മെച്ചപ്പെട്ട് കൊണ്ടിരിക്കുകയാണ്. അവന്‍ കൂടുതല്‍ കൂടുതല്‍ പരിപൂര്‍ണനായിക്കൊണ്ടിരിക്കുന്നു,' ജോ കോള്‍ പറഞ്ഞു.
'ഞാന്‍ പറയുന്നത് ശ്രദ്ധിക്കൂ അവന്‍ ആയിരം കരിയര്‍ ഗോള്‍ തികക്കുമെന്ന് തന്നെയാണ് എന്റെ വിശ്വാസം,' ജോ കോള്‍ കൂട്ടിച്ചേര്‍ത്തു.

അതേസമയം ഈ സീസണില്‍ 39 മത്സരങ്ങളില്‍ നിന്നും സിറ്റിക്കായി 45 ഗോളുകള്‍ സ്വന്തമാക്കാന്‍ ഹാലണ്ടിന് സാധിച്ചിട്ടുണ്ട്.
ഏപ്രില്‍ 15ന് ലെസ്റ്റര്‍ സിറ്റിക്കെതിരെയാണ് മാഞ്ചസ്റ്റര്‍ സിറ്റിയുടെ അടുത്ത മത്സരം.