തിരുവനന്തപുരം: രാജ്യാന്തര കമ്പോളത്തില്‍ ക്രൂഡ് ഓയിലിനു വില കുറയുമ്പോള്‍ പെട്രോളിയം ഉത്പന്നങ്ങളുടെ എക്‌സൈസ് തീരുവയില്‍ വര്‍ധന വരുത്തുന്ന രീതി കേന്ദ്രസര്‍ക്കാര്‍ അവസാനിപ്പിക്കണമെന്ന് മുഖ്യമന്ത്രി.

നിയമസഭയില്‍ സി.എച്ച് കുഞ്ഞമ്പുവിന്റെ ശ്രദ്ധക്ഷണിക്കലിനു മറുപടി നല്‍കുകയായിരുന്നു മുഖ്യമന്ത്രി. 2021 ഫെബ്രുവരിയിലെ കേന്ദ്ര കണക്കുപ്രകാരം പെട്രോളിന്‍ മേല്‍ ചുമത്തിയിരുന്ന 67 രൂപ എക്‌സൈസ് തീരുവയില്‍ വെറും നാലു രൂപ മാത്രമാണ് സംസ്ഥാനങ്ങളുമായി പങ്കുവയ്‌ക്കേണ്ട ബേസിക് എക്‌സൈസ് തീരുവ. ഈ അവസ്ഥ നിലനില്‍ക്കെയാണ് സംസ്ഥാന സര്‍ക്കാര്‍ നികുതി കുറയ്ക്കണമെന്ന വിചിത്ര വാദം കേന്ദ്രം ഉയര്‍ത്തുന്നത്.

കേന്ദ്ര സര്‍ക്കാരിന്റെ കഴിഞ്ഞ ആറു വര്‍ഷക്കാലത്തെ കണക്കുകള്‍ പരിശോധിച്ചാല്‍ പെട്രോളിനും ഡീസലിനും മേലുള്ള നികുതി 307 ശതമാനം വര്‍ധിച്ചതായി കാണാം. 2021 ല്‍ ഇതിനകം 19 തവണ പെട്രോള്‍, ഡീസല്‍ വിലയില്‍ വര്‍ധനയുണ്ടായെന്നും മുഖ്യമന്ത്രി പറഞ്ഞു.