മസ്കത്ത്​: ഒമാനിലെ വിവിധ ഗവർണറേറ്റുകളിൽ കനത്ത മഴ. ശക്തമായും കാറ്റിനോടും ഇടിയോടും കൂടിയാണ് ശക്തമായ മഴ പെയ്തത്. ചിലയിടങ്ങളിൽ ആലിപ്പഴവും വർഷിച്ചു. രണ്ട് ദിവസമായി രാജ്യത്തിന്റെ വിവിധ ഭാഗങ്ങളിൽ മഴ തുടരുകയാണ്. അനിഷ്ട സംഭവങ്ങളളൊന്നും ഇതുവരെയും റിപ്പോർട്ട്​ ചെയ്തിട്ടില്ല.

സൂർ, സമാഇൽ, അൽ അവാബി, ബിദ്​യ, അൽകാമിൽ അൽവാഫി, തെക്കൻ അമീറാത്ത്​, ജഅലാൻ ബാനി ബൂ അലി തുടങ്ങിയ സ്ഥലങ്ങളിലാണ്​ ഭേദപ്പെട്ട മഴ ലഭിച്ചത്​. മഴ കിട്ടിയ സ്ഥലങ്ങളിലെല്ലാം രാവിലെ മുതൽക്കേ മൂടിക്കെട്ടിയ അന്തരീക്ഷമായിരുന്നു. ഉച്ചക്ക് ശേഷമാണ്​ മഴ കനത്തത്​.

വിവിധ ഇടങ്ങളിൽ വാദികൾ നിറഞ്ഞൊഴുകുന്നതിനാൽ മുറിച്ച്​ കടക്കാൻ ശ്രമിക്കരുതെന്ന്​ നിർദ്ദേശം നൽകി​. ഉൾഗ്രാമങ്ങളിൽ റോഡുകളിൽ വെള്ളം കയറി നേരിയ തോതിൽ ഗതാഗതം തടസ്സപ്പെട്ടു.

അതേസമയം വായു മർദ്ദത്തിന്‍റെ ഭാഗമായി അൽ-ഹജർ പർവതനിരകളിലും സമീപ പ്രദേശങ്ങളിലും ഒറ്റപ്പെട്ട മഴക്കും ഇടിമിന്നലിനും കാറ്റിനും സാധ്യതയുണ്ടെന്ന്​ കാലാവസ്ഥാ നിരീക്ഷണ കേന്ദ്രം അറിയിച്ചു.