ഡല്‍ഹി: പ്രതിഷേധം ആളിക്കത്തുന്നതിനിടയിലും ഹ്രസ്വകാല സൈനിക റിക്രൂട്ട്‌മെന്റ് സ്‌കീമായ അഗ്നിപഥില്‍ നിന്ന് പിന്നോട്ടില്ലെന്ന് കേന്ദ്ര സര്‍ക്കാര്‍. അഗ്നിപഥ് സ്‌കീം പിന്‍വലിക്കേണ്ട കാര്യമില്ലെന്ന് കേന്ദ്ര പ്രതിരോധമന്ത്രി രാജ്‌നാഥ് സിങ് പറഞ്ഞു. രണ്ട് വര്‍ഷമായി സൈന്യത്തിലേക്ക് നിയമനം നടത്താത്തതിനാലാണ് പ്രായപരിധി ഉയര്‍ത്തിയതെന്നും മന്ത്രി പറഞ്ഞു.

സൈന്യത്തിലെ കരാര്‍ നിയമനത്തിനായുള്ള അഗ്‌നിപഥ് പദ്ധതിക്കെതിരെ രാജ്യവ്യാപക പ്രതിഷേധം തുടരുകയാണ്. ബിഹാറില്‍ രണ്ട് ട്രെയിനുകള്‍ക്ക് തീവെച്ചു. മൊഹിയുദ്ദി നഗര്‍ സ്റ്റേഷനിലാണ് പാസഞ്ചര്‍ ട്രെയിന്‍ കത്തിച്ചത്. ജമ്മുതാവിഗുവാഹത്തി എക്‌സ്പ്രസ് ട്രെയിനിനും പ്രതിഷേധക്കാര്‍ തീയിട്ടു. ഉത്തര്‍പ്രദേശില്‍ ഒരു ട്രെയിന്‍ പ്രതിഷേധക്കാര്‍ അടിച്ചു തകര്‍ത്തു. ബാലിയ സ്റ്റേഷനിലാണ് സംഭവം. തുടര്‍ന്ന് പൊലീസെത്തിയാണ് പ്രതിഷേധക്കാരെ നീക്കിയത്. ഡല്‍ഹി കൊല്‍ക്കത്ത നഗരങ്ങളെ ബന്ധിപ്പിക്കുന്ന ദേശീയ പാത പ്രതിഷേധക്കാര്‍ അടച്ചു.