തിരുവനന്തപുരം
വിഴിഞ്ഞം മുക്കോല ബൈപാസില്‍ മത്സരയോട്ടത്തിനിടെ ബൈക്കുകള്‍ കൂട്ടിയിടിച്ച് രണ്ടുപേര്‍ മരിച്ചു. ചൊവ്വര സ്വദേശി ശരത്, വട്ടിയൂര്‍ക്കാവ് സ്വദേശി മുഹമ്മദ് ഫിറോസ് എന്നിവരാണ് മരിച്ചത്. ഇന്ന് വൈകിട്ടാണ് അപകടം.

അമിതവേഗതയില്‍ മത്സരയോട്ടം നടത്തിയ രണ്ട് ബൈക്കുകള്‍ കൂട്ടിയിടിക്കുകയായിരുന്നു. അപകടത്തില്‍ സാരമായി പരുക്കേറ്റ രണ്ട് പേരെയും പൊലിസും നാട്ടുകാരും ചേര്‍ന്ന് ആശുപത്രിയിലെത്തിച്ചെങ്കിലും രക്ഷിക്കാനായില്ല. അപകടത്തില്‍ ബൈക്കുകളുടെ മുന്‍ഭാഗം പൂര്‍ണമായും തകര്‍ന്ന നിലയിലാണ്.

വിഴിഞ്ഞം മുക്കോല ബൈപാസില്‍ ബൈക്ക് റേസിങ് പതിവാണ്. ബൈക്ക് റേസിങ് നിയന്ത്രിക്കുന്നതിൻ്റെ ഭാഗമായി
പൊലിസ് പരിശോധന കര്‍ശനമാക്കിയിരുന്നു. ഇന്ന് രാവിലെ നടത്തിയ പരിശോധനയില്‍ നാല് ബൈക്കുകള്‍ പിടിച്ചെടുക്കുകയും ചെയ്തിരുന്നു.