മുംബൈ: ശിവസേന വിമതര്‍ പുതിയ സംഘത്തിന് 'ശിവസേന ബാലസാഹെബ് താക്കറെ' എന്ന പേരിടാനുള്ള നീക്കത്തിനെതിരെ തെരഞ്ഞെടുപ്പ് കമ്മീഷനെ സമീപിച്ച് മഹാരാഷ്ട്ര മുഖ്യമന്ത്രി ഉദ്ധവ് താക്കറെ. തന്റെ പീതാവിന്റെ പേര് വിമത സംഘം ദുരുപയോഗം ചെയ്യുകയാണെന്നാണ് ആരോപണം.

വിമത സംഘത്തിലെ എം.എല്‍.എ ദീപക് കസേക്കറാണ് 'ശിവസേന ബാലസാഹെബ് താക്കറെ' എന്ന പേര് ആദ്യം പറഞ്ഞത്. തൊട്ടുപിന്നാലെ അത് വിഴുങ്ങി. തങ്ങള്‍ക്ക് മൂന്നില്‍ രണ്ട് ഭൂരിപക്ഷമുണ്ടെന്നും ശിവസേനയുടെ പ്രത്യേക 'ബ്ലോക്കാ'യി നില്‍ക്കുമെന്നുമാണ് തിരുത്ത്. പാര്‍ട്ടിയേയോ മുഖ്യമന്ത്രിയേയോ കൈവിട്ടിട്ടില്ലെന്നും വിമതര്‍ പറഞ്ഞു. എന്നാല്‍, ശിവസേനയുടെ പൂര്‍ണ അധികാരം ഉദ്ധവിനാണെന്നും സേനയുടെയും ബാല്‍ താക്കറെയുടെയും പേര് ദുരുപയോഗം ചെയ്യുന്നവര്‍ക്കെതിരെ നടപടി ആവശ്യപ്പെട്ടും പാര്‍ട്ടി ദേശീയ നിര്‍വാഹക സമിതി പ്രമേയം പാസാക്കി.