തിരുവനന്തപുരം: സംസ്ഥാനത്ത് ഇടഞ്ഞുനില്‍ക്കുന്ന ഗ്രൂപ്പുകളെ ഒപ്പം നിര്‍ത്താനുള്ള നീക്കങ്ങളുടെ ഭാഗമായി രമേശ് ചെന്നിത്തലയെ ഹൈക്കമാന്‍ഡ് ഡല്‍ഹിക്ക് വിളിപ്പിച്ചു. വെള്ളിയാഴ്ച ഡല്‍ഹിയിലെത്താന്‍ രാഹുല്‍ ഗാന്ധിയാണ് ചെന്നിത്തലയോട് നിര്‍ദേശിച്ചത്.
കെ. സുധാകരന്‍ കെ.പി.സി.സി. പ്രസിഡന്റായി ചുമതലയേറ്റതിനു പിന്നാലെ ഐ ഗ്രൂപ്പിന്റെ നേതാവുകൂടിയായ ചെന്നിത്തലയെ ഡല്‍ഹിയിലേക്ക് വിളിപ്പിച്ചതിന് ഏറെ പ്രാധാന്യമുണ്ട്. പ്രതിപക്ഷനേതാവിനെയും കെ.പി.സി.സി. പ്രസിഡന്റിനെയും തീരുമാനിച്ചപ്പോള്‍ കൂടിയാലോചിച്ചില്ലെന്ന പരാതി ഗ്രൂപ്പുകള്‍ക്കുണ്ട്. യു.ഡി.എഫ്. കണ്‍വീനറെ നിശ്ചയിക്കുന്നതിലുള്‍പ്പെടെ ചെന്നിത്തലയുമായി ഹൈക്കമാന്‍ഡ് കൂടിയാലോചന നടത്തുമെന്ന സൂചനയുണ്ട്.

അതിനിടെ, തനിക്കെതിരേ നടന്ന നീക്കങ്ങളെക്കുറിച്ച് കെ.പി.സി.സി പ്രസിഡന്റ് ചുമതലയേല്‍ക്കുന്ന ചടങ്ങില്‍ ചെന്നിത്തല പറയാതെ പറഞ്ഞു. താന്‍ ആര്‍.എസ്.എസുകാരനാണെന്ന് സി.പി.എം പ്രചരിപ്പിച്ചപ്പോള്‍ പാര്‍ട്ടിയില്‍ ആരും പ്രതികരിക്കാതിരുന്നതില്‍ വേദനയുണ്ടെന്ന് അദ്ദേഹം പറഞ്ഞു.